«Ոչ մի գրամ ադեկվատություն չկա ո՛չ խորհրդարանում, ո՛չ խորհրդարանից դուրս». Անի Սամսոնյան

Նախկին պատգամավոր Անի Սամսոնյանը ֆեյսբուքյան իր էջում գրում է. «Ադրբեջանը տեղեկատվական կեղծ հոսքերով նախապատրաստում է հաջորդ սադրանքը: Սա սահմանային վիճակի ապակայունացման ցուցիչ է: Իսկ ինչ է կատարվում Հայաստանում:

Քաղաքական դաշտի մի հատվածը թռչկոտում է Ուկրաինայում ռուսական ռազմական անհաջողություններից, մի հատվածը հայհոյում է Արևմուտքին՝ առանց գիտակցելու մեզ ուղղակիորեն չվերաբերող պատերազմում կողմերին «սևացնելու» կամ «հերոսացնելու» պրոպագանդայի հետևանքները:

Ազգային ժողովի նստաշրջանը բացվում է միայն մեծամասնության պառլամենտում իրենց միակուսակցական իշխանությամբ հպարտ պատգամավորներով: Խորհրդարանական ընդդիմությունն առանձին հանրային քննարկում է անցկացնում կրկնվող անիմաստ ու անօգուտ տեքստերով՝ սպասելով, թե երբ պիտի վիճակը սրվի, կորուստներ ունենանք, որ իշխանությունը վերցնելու հաջորդ փորձն անեն:

Իսկ քաղաքականությունից և քաղաքական գործիչներից հիասթափված հանրությունը դանդաղ ընկղմվում է նիրհի մեջ: Մարդիկ իրենց տղա երեխաներին երկրից հանելու հարցն են լուծում:

Ոչ մի գրամ ադեկվատություն և պատասխանատվություն չկա ո՛չ խորհրդարանում, ո՛չ խորհրդարանից դուրս: Նոր պատերազմի մեջ հայտնվելու դեպքում չկա որևէ պետական մարմին, որը կարող է կատարել մարդկանց ոգեպնդելու իր առաքելությունը: Համատարած անվստահություն է՝ հատկապես պառակտված ու սպառված պառլամենտի նկատմամբ: Խաղաղություն մեր սահմաններին»: