Երեքշաբթի, 21 ապրիլի, 2026 թ.
|
Ստեփանակերտում`   +6 °C

Էստոնիայի պատգամավորները Ռուսաստանը ճանաչում են որպես «ահաբեկչության հովանավոր պետություն»

Էստոնիայի պատգամավորները Ռուսաստանը ճանաչում են որպես «ահաբեկչության հովանավոր պետություն»
1416
Երեքշաբթի, 18 հոկտեմբերի, 2022 թ., 22:48

Էստոնիայի խորհրդարանը Ռուսաստանը ճանաչել է որպես «ահաբեկչության հովանավոր պետություն»։ Համապատասխան բանաձևին երեքշաբթի օրը կողմ է քվեարկել միապալատ խորհրդարանի (Ռեյգիկոգու) 88 պատգամավոր։ Ձեռնպահ կամ դեմ ձայներ չեն եղել:

Փաստաթղթում խոսվում է ինչպես Ուկրաինայի վրա հարձակման փաստի, այնպես էլ դրա առանցքային իրադարձությունների անվերապահ դատապարտման մասին՝ քաղաքացիական օբյեկտներին հարվածներ, խաղաղ բնակիչների մահ և տարածքների բռնակցում՝ այսպես կոչված՝ հանրաքվեներից հետո անջատողական հանրապետություններում և օկուպացված տարածքներում: Փաստաթուղթը պարունակում է նաև Ռուսաստանին ՄԱԿ-ի Անվտանգության խորհրդի կազմից բացառելու պահանջ։

«Պուտինի ռեժիմը, որը սպառնում է միջուկային զենքով, Ռուսաստանը դարձրել է ամենամեծ սպառնալիքը Եվրոպայում և աշխարհում»,- ասվում է բանաձևում։ Այն նաև խոսում է «միասին պատասխան հարված հասցնելու» անհրաժեշտության մասին և կոչ է անում միջազգային հանրությանը՝ ընդունել նմանատիպ հռչակագրեր։

Միևնույն ժամանակ, մերժվել են Էստոնիայի խորհրդարանի վերջնական փաստաթղթի մի քանի ուղղումներ, այդ թվում՝ կոչը ՆԱՏՕ-ին և ԵՄ երկրներին՝ անհապաղ դուրս բերել իրենց դեսպաններին Մոսկվայից և փակել բոլոր դիվանագիտական ​​ներկայացուցչությունները, նաև կոչը՝ թույլ չտալ ռուսներին ապաստան ստանալ ԵՄ երկրներում, ինչպես նաև կոչ Էստոնիայի կառավարությանը՝ ամբողջությամբ փակել Ռուսաստանի հետ սահմանները և դուրս գալ բոլոր սահմանային պայմանագրերից։

Ավելի վաղ նմանատիպ բանաձև էին ընդունել Լատվիայի և Լիտվայի խորհրդարանները: