«Պիտի գնահատենք՝ ինչպիսի պատերազմի ենք պատրաստվում, նոր որոշենք՝ դրա համար ինչ զենք ենք գնում». Արծրուն Հովհաննիսյան

ԱԺ պաշտպանության և անվտանգության հարցերի մշտական հանձնաժողովի փորձագետ Արծրուն Հովհաննիսյանը «Առաջին լրատվական»-ին տված հարցազրույցում անդրադարձել է Հնդկաստանից զենքի ձեռքբերմանը. «Գաղտնիք չէ, որ ունենք խնդիր մեր կործանիչները շատացնելու։ Հնդկաստանը ունի ֆանտաստիկ հակատանկային հրթիռային տեխնոլոգիաներ, Հնդկաստանը SU-30-ի ամենամեծ օպերատորն է աշխարհում: Ռուսաստանից ավելի շատ ՍՈՒ-30 ունի, նաև ունեն լավ փորձ՝ տարբեր ԱԹՍ-ների։
Ես, իհարկե, կուզենայի, որ մենք աշխատենք օրինակ՝ Շվեդիայի, ԱՄՆ-ի հետ, ստանայինք աշխարհի ամենավերջին տեխնոլոգիաները, բայց այսօր կան քաղաքական խոչընդոտներ, խանգարող և օգնող հանգամանքներ։ Սակայն այն խնդիրները, որոնք համարում ենք առաջնահերթ, որոնք կարող են մեր անվտանգությունը շեշտակի բարձրացնել, միանշանակ կարելի է Հնդկաստանում գտնել»,- ասել է Հովհաննիսյանը՝ հավելելով. «Բայց, եկեք չընկնենք երազանքների գիրկը և սիրողական չխոսենք ռազամական գործի մասին։ Մինչև մենք ռազմագիտական մի քանի խնդիր չլուծենք, ոչ մի բերած զենք մեր հարցերը չի փակելու։ Մենք պիտի գնահատենք՝ ինչպիսի պատերազմի ենք մենք պատրաստվում, հետո նոր որոշենք՝ դրա համար ինչ զենք ենք գնում»։