«Լավ չէ՞ր լինի այդ 540 միլիոնին մի քիչ էլ ավելացնել և հայտնաբերել թմրանյութերը տարածողին». Գ. Նազարյան

Ազգային ժողովում «Ընտանիքում բռնության կանխարգելման և բռնության ենթարկված անձանց պաշտպանության և ընտանիքում համերաշխության վերականգնման օրենքում լրացումներ կատարելու մասին օրենքի նախագծի քննարկման ժամանակ հիմնական զեկուցող Ներքին գործերի նախարարի տեղակալ Արփինե Սարգսյանը ներկայացրեց, թե ժամանակակից ինչ միջոցներ են կիրառվում բռնության դեպքերը բացահայտելու համար՝ նշելով, որ 540 միլիոն է անհարժեշտ ընտանեկան բռնության զոհերի հսկողության համար: «Նախագծով առաջարկվում է այս որոշումների իրականացման տեսանկյունից օգտագործել էլեկտրոնային հսկողության միջոցներ, որը պրակտիկորեն ավելի հեշտացնում է բռնարարի արարքները և զոհի պաշտպանությունն իրականացնելը: Բռնարարի և զոհի կողքին պետք է տեղադրվի համապատասխան սարքը, որը ենթադրում է՝ իրար մոտենալու կամ որևէ խախտման դեպքում ահազանգման համապատասխան հաղորդագրություն կուղարկվի իրավասու մարմնին»,- ասաց հիմնական զեկուցողը:

Արձագանքելով՝ «Հայաստան» խմբակցության պատգամավոր Գեղամ Նազարյանն ասաց. «Իհարկե լավ է, որ բռնության ենթարկվողին պաշտպանում եք, բայց չե՞ք մտածել, որ պետությունը խնդիր ունի, օրինակ, այդ 540 միլիոն դրամի կեսը գործածելով՝ այլ միջոցառումներով պարզել պատճառները և այդ խնդիրները կարգավորել: Օրինակ, լավ չէ՞ր լինի այդ 540 միլիոնին մի քիչ էլ ավելացվեր՝ հայտնաբերվեր թմրանյութերը տարածողին, որ ընտանիքում այդ բռնությունները չլինեն, որովհետև մենք գիտենք, որ այդ բռնությունները լինում են այդ թմրանյութերի ազդեցության տակ»: