«Սա միֆական քաղցկեղ է, որը հայ ուսյալ երիտասարդների շրջանում լայն տարածում ունի». Կ. Փաշոյան

Հրապարակախոս Կարպիս Փաշոյանը ֆեյսբուքյան իր էջում գրել է․ ««Հայերի համար, որոնք հեռու են ապրում Հայաստանից, շատ հեշտ ա խոսել՝ թող պայքարեն Ադրբեջանի դեմ, Թուրքիայի դեմ, տաք տեղից, հանգիստ տեղից, անվտանգ տեղից շատ հեշտ ա խոսալը, բայց Հայաստանում մարդիկ անընդհատ պատերազմի վտանգի տակ են ապրում և ես ուղղակի ողջունում և հաջողություն եմ ցանկանում խաղաղության հաստատելու էս ճանապարհին, իմ կարծիքով Հայաստանում ապրող հայերին օր առաջ հարկավոր է խաղաղությունը, սահմանների բացելը, և հասկանում եմ Դուք շատ ծանր բեռ եք Ձեզ վրա վերցրել, բայց իրոք շատ մեծ հաջողություն եմ Ձեզ ցանկանում․․․»։
Այսպիսի խոսք է ասել Գերմանիայում վարչապետ Փաշինյանի հետ հանդիպման մասնակիցներից մեկը։ Չեմ ուզում կոշտ գնահատականներ տալ, բայց միտքը կապ չունի ո՛չ խաղաղության և ո՛չ էլ պատերազմի հետ։ Սա ընդամենը իրականությունից կտրված դոգմատիկ մտածողության և գաղափարների մեխանիկական վերարտադրության արդյունքն է։ Սա արևմտյան դիպլոմներով զրահավորված, սպիտակ մարդու քաղաքակրթության մեջ ապաստանած պրովինցիալ բարդույթի հետևանք է։ Սա միֆական քաղցկեղ է, որը, ցավոք սրտի, հայ ուսյալ երիտասարդների շրջանում լայն տարածում ունի։
Թեզը կառուցվում է այն հիմքի վրա, թե Հայաստանը ագրեսոր է, հասարակությունը ռազմատենչ է և Փաշինյանի մեկ խիզախ քայլը խաղաղություն կբերի տարածաշրջանին։ Միֆի հակառակ կողմում Ցեղասպանության հարցն է, երբ շատ հայեր ջանասիրաբար վերաարտադրում են Թուրքիայի ԱԳՆ-ի տեսակետը, որի համաձայն հենց «դավաճան» հայերն են մեղավոր իրենց բնաջնջման համար։
Վերոհիշյալ մտքի հեղինակը ոչ վաղ անցյալում ապրել է Հայաստանում։ Եթե հիշողությունս չի դավաճանում, որևէ կերպ չի աջակցել 2017 թ․-ի խաղաղության շարժմանը, չի կարևորել Ղարաբաղյան հակամարտության խաղաղ կարգավորման անհրաժեշտությունը։ Իսկ հիմա թյուրքական, ռուսական և արևմտյան իմպերիալիստական հոսանքների հարվածների տակ արնաքամ լինող Հայաստանին և շրջափակված Արցախին Վիետնամական պատերազմի դեմ պայքարող ամերիկյան ինտելեկտուալին հարիր տեքստեր է պարտադրում։
Ու այդ տեքստը ասում է մի մարդու, որը ոչինչ չի արել պատերազմը կանխելու կամ էլ ճիշտ ժամանակին կանգնեցնելու համար, որի սխալ որոշոմների պատճառով հազարավոր մարդկային կյանքեր են խեղվել:
Ցավում եմ այս կեղծիքի ու երեսպաշտության համար։ Ես միշտ եմ խաղաղության կողմնակից եղել, գոնե վերջին 7-8 տարիներին գնացել եմ հենց այդ քաղաքականությունը առաջ մղող ուժի ետևից։ Բայց անկախ ամեն ինչից, նույնիսկ խաղաղության հնարավորության պարագայում որևէ մեկը իրավունք չունի այս ժողովրդին զրկել պայքարի ներուժից՝ փոխակերպելով անգիտակից և հիշողություն չունեցող նախիրի»։