Հայաստանը կմասնակցի ԱՄՆ-ի գլխավորած Defender 23 զորավարժություններին

1057

Հինգշաբթի, 06 ապրիլի, 2023 թ., 18:30

Հայաստանն ու Մոլդովան կմասնակցեն Միացյալ Նահանգների գլխավորած բազմազգ լայնածավալ զորավարժություններին, հայտնում է ԱՄՆ պաշտպանության նախարարությունը։
Ապրիլի 22-ին Եվրոպայում կմեկնարկեն Defender 23 զորավարժությունները, որոնք կտևեն երկու ամիս և կընդգրկեն եվրոպական 10 երկրների տարածք։

Զորավարժություններին կմասնակցի շուրջ 9000 ԱՄՆ զինվորական և շուրջ 17000 զինծառայող 26 դաշնակից և գործընկեր երկրներից: Այդ երկրներն են՝ Ալբանիա, Հայաստան, Բոսնիա և Հերցեգովինա, Բուլղարիա, Խորվաթիա, Չեխիա, Դանիա, Էստոնիա, Ֆրանսիա, Վրաստան, Գերմանիա, Հունաստան, Հունգարիա, Իտալիա, Կոսովո, Մոլդովա, Չեռնոգորիա, Նիդեռլանդներ, Հյուսիսային Մակեդոնիա, Լեհաստան, Ռումինիա, Սլովենիա, Իսպանիա, Շվեդիա և Մեծ Բրիտանիա։

«Defender 23» զորավարժությունները, սկսված 2021 թվականից, ղեկավարվում են ԱՄՆ-ի եվրոպական և աֆրիկյան բանակների կողմից։ Դրանք նպատակ ունեն ցույց տալու ամերիկյան զորքի կարողությունը զինտեխնիկան արագորեն տեղակայելու, դաշնակիցներին աջակցելու, Եվրոպայի խաղաղության հնարավոր խաթարումը կանխելու, ինչպես նաև՝ մայրցամաքը ագրեսիայից պաշտպանելու կարողությունը: