«Նոր ու առողջ ուժերը պետք է միավորվեն»․ Նորայր Նորիկյան

«Արդար Հայաստան» կուսակցության նախագահ Նորայր Նորիկյանը ֆեյսբուքյան իր էջում գրառում է կատարել՝ կցելով տեսանյութ․ «Համաձայն եմ՝ քաղաքական մտքի վակուում կա։ Գտնում եմ, որ նոր ու առողջ ուժերը պետք է միավորվեն, և ես դիմում եմ մեր բոլոր քաղաքացիներին, որոնք մտահոգ են, որոնք չեն համակերպվում ստեղծված իրավիճակի հետ, որոնք գլոբալ ու իրական փոփոխությունների կողմնակից են․
պետք է վայր դնենք բոլոր տեսակի կուսակցական ամբիցիաներն ու ամբարենք մեր մտավոր, գիտական ու քաղաքական միտքը և կարողանանք հայտ ներկայացնել մեր ժողովրդին։
Պետք է ԲԵԿՈՒՄ իրականացնենք ու շրջադարձային փոփոխություններ․․․
Հույս ունեմ, որ այս տարի կկարողանանք մեր նման մտածող մարդկանց հետ միասին բեկել քաղաքական գործընթացների տրամաբանությունը, դուրս գալ այս ՆԵՐԿԱ-ՆԱԽԿԻՆ կործանարար ու փակուղային իրավիճակից, իսկապես ուրվագծել Հայաստանի համապարփակ զարգացման հեռանկարը, անկեղծ լինել ժողովրդի հետ, ներկայացնել իրական խաղաղություն հասնելու հնարավորությունը, չխաբել ժողովրդին, պոպուլիզմով չզբաղվել, ցույց տալ հնարավոր աշխարհաքաղաքական կենտրոնների բախման արդյունքում մեր հնարավոր քայլերի հերթականությունը, քանի որ գործող իշխանությունը չի տվել նաև այդ հարցերի պատասխանները, թե Ռուսաստան-հավաքական Արևմուտք կոնֆլիկտի ցանկացած վերջաբանի արդյունքում ինչպի՞սի ռազմավարական փաթեթ է ինքը ներկայացնելու այդ կենտրոնների հետ հարաբերվելիս, Թուրքիայի ու Իրանի հետ հարաբերվելիս․․․
Այս հարցերի պատասխանը չտված, իջել ենք արդեն դպրոցներում վոլեյբոլի ցանցերի, կախիչների ու զուգարանների ապակիների լուծման հարթություն․․․»։