«Ադրբեջանը շարունակում է վարել՝ «այն, ինչ ուզում եմ, տվեք բանակցային եղանակով, հակառակ դեպքում՝ կվերցնեմ պատերազմով» քաղաքականությունը». վարչապետ

«Հանգամանքները հիմք են տալիս եզրակացնելու, որ Ադրբեջանը շարունակում է վարել՝ այն, ինչ ուզում եմ, տվեք ինձ բանակցային եղանակով, հակառակ դեպքում՝ ես դա կվերցնեմ պատերազմով քաղաքականությունը»,- Կառավարության նիստի ժամանակ հայտարարել է ՀՀ վարչապետ Նիկոլ Փաշինյանը: «Իսկ ի՞նչ է ուզում Ադրբեջանը. նկատել եք, որ Ադրբեջանը պարբերաբար խոսում է, ինչպես ինքն է ձևակերպում, 4 գյուղերի տարածքների մասին, միևնույն ժամանակ հրաժարվելով ընդունել, որ ադրբեջանական օկուպացիայի տակ են գտնվում ՀՀ 31 ոչ անկլավային գյուղերի կենսական նշանակության տարածքներ»,- հավելել է նա: Փաշինյանի խոսքով՝ իրավիճակին հայկական կողմի դիրքորոշումը կառուցողական է. «Մենք ասում ենք՝ որպեսզի զորքերն իրենց այսօրվա դիրքերից ետ գնան, անհրաժեշտ է քարտեզի ու գետնի վրա վերարտադրել Հայաստան-Ադրբեջան սահմանն ու երկուստեք զորքերը ետ քաշել սահմանի գծի նկատմամբ: Բաքուն փորձում է իրադրությունը ձևակերպել այնպես, որ ադրբեջանական զորքերը ՀՀ 31 գյուղերի տարածքներից որևէ կերպ ետ չգնան: Սա կառուցողական դիրքորոշում չէ»,- ասել է Կառավարության ղեկավարը: