«Հայաստանը դեռ չի պատասխանել Ռուսաստանի առաջարկին»․ Զախարովա

Հայաստանը դեռ չի պատասխանել միջգերատեսչական խորհրդակցություններ անցկացնելու՝ Ռուսաստանի առաջարկին: Այս մասին ճեպազրույցի ժամանակ հայտարարել է Ռուսաստանի պաշտոնական ներկայացուցիչ Մարիա Զախարովան՝ անդրադառնալով ՀԱՊԿ-ի՝ պարտավորությունները չկատարելու վերաբերյալ հայ պաշտոնյաների դժգոհությունների մասին հարցին:

«Մեր հայ դաշնակիցներին առաջարկել էինք միջգերատեսչական խորհրդակցություններ անցկացնել, որպեսզի առարկայական քննարկվեն և փարատվեն նրանց մտահոգությունները, սակայն դեռ պատասխան չենք ստացել: Վերջին շրջանում Հայաստանի իշխանությունները բազմիցս քննադատական արտահայտություններ են թույլ տվել Ռուսաստանի հասցեին, Երևանը բաց է թողել որոշ հանդիպումներ: Մասնավորապես, Հայաստանի վարչապետ Նիկոլ Փաշինյանը չի մասնակցել Մինսկում ՀԱՊԿ գագաթնաժողովին, ինչպես նաև հայտարարել է, որ ՀՀ-ը սառեցրել է ՀԱՊԿ-ին մասնակցությունը: Մոսկվան հույս ունի Երևանից պատասխան ստանալ՝ ինտեգրացիոն կառույցներում պարտավորությունների կատարման, այդ թվում՝ ՀԱՊԿ-ում մասնակցության վերաբերյալ»,- ասել է Զախարովան: