«Մեզ համար անհրաժեշտ է առավելագույն օգուտ քաղել»․ Արա Պողոսյան

Քաղաքագետ Արա Պողոսյանի ֆեյսբուքյան գրառումը․ «Քանի որ աշխարհաքաղաքական կենտրոններում ցանկացած տեղաշարժ ուղիղ ազդեցություն է թողնում Հարավային Կովկասի և հատկապես Հայաստանի վրա (Հայաստանի իշխանությունների անհեռատես և հախուռն արտաքին քաղաքականության պատճառով հատկապես), ուստի հնարավոր չէ ուշադրություն չդարձնել ԱՄՆ-ում սպասվելիք հավանական փոփոխություններին։ Նախագահ Բայդենի՝ մրցապայքարից դուրս գալու և ԱՄՆ փոխնախագահ Քամալա Հարիսի հավանական թեկնածու դառնալու հեռանկարը կարող է ազդեցություն ունենալ նախագահական ընտրությունների վրա։ Մինչև երեկ նախկին նախագահ Դոնալդ Թրամփը բացարձակ ֆավորիտն էր համարվում, սակայն այսօր արդեն ոչինչ կանխորոշված չի կարելի համարել։ Եվ այստեղ մեր շահերի տեսանկյունից ակնհայտ է, որ Դոնալդ Թրամփի նախագահ դառնալու պարագայում Հայաստանի մասով դրական ակնկալիքներ առնվազն չկան, մյուս կողմից հավանական է, որ Թրամփը ներմայրցամաքային քաղաքականություն է վարելու, կենտրոնանալով ներամերիկյան խնդիրների վրա, այս իմաստով Դեմոկրատական կուսակցությունն այլ մոտեցում ունի։ Եվ ի՞նչը կարող է լինել Հայաստանի համար ավելի շահեկան։ Այստեղ Դեմոկրատական կուսակցությունը խնդիր ունի իր շանսերը մեծացնել, իսկ դրանում կարող է գործոն լինել նաև ԱՄՆ հայկական համայնքը և հայկական լոբբիստական կազմակերպությունները։
Մասնավորապես կարևոր է ԼՂՀ հայերի իրավունքների և արժանապատիվ վերադարձի, Ադրբեջանի նկատմամբ իրական ճնշումներ կիրառելու, Հայաստանին տեխնոլոգիաներ տրամադրելու մասով ստանալ արժանահավատ խոստումներ։ Ինչքանո՞վ է դա ի զորու անել ԱՄՆ հայկական համայնքը, սա քննարկման հարց է, բայց այն, որ սա հնարավոր է, հատկապես հիմա, երբ դեմոկրատներն այնքան կարիք ունեն հավելյալ աջակցության, լրիվ իրատեսական է։ Բայց կա նաև այլ խնդիր՝ «իսկ եթե այնուամենայնիվ հաղթի Թրամփը՞»: Այս պարագայում Թրամփի քաղաքականությունը Հարավային Կովկասում գրեթե կանխատեսելի է լինելու, եթե իհարկե նա իր կողմից հռչակած ռեգիոնալիզմի քաղաքականությունը վարի, իսկ գլոբալ գործընթացներին նվազագույն մասնակցություն ցուցաբերի։
Մյուս կողմից ամենայն հավանականությամբ կլինեն նաև հավելյալ ռիսկեր, հաշվի առնելով Թրամփի բնավորությունը, բայց մեզ համար անհրաժեշտ է առավելագույն օգուտ քաղել, քանի որ այլ ճանապարհ պարզապես թողնված չի մեզ՝ սեփական իշխանությունների և նրանց սպասարկող ինֆանտիլ «գործիչների» ձեռամբ։
Աստված պահպանի Հայաստանը»։