«125 միլիարդանոց բյուջեն ո՞ւր է գնում». Մանուկ Սուքիասյան

Երևանի ավագանու «Մայր Հայաստան» խմբակցության ղեկավար Մանուկ Սուքիասյանը «Խոսքի իրավունք»-ի եթերում անդրադարձել է Երևանի աղբահանության խնդրին․«2020-2021թթ. Երևանի աղբահանության բյուջե՝ յուրաքանչյուր տարի եղել է 4,5 միլիարդ դրամի հատկացում քաղաքային բյուջեից, 2022-2023թթ. յուրաքանչյուր տարի եղել է 7 միլիարդ։ 2020-2021թթ. համեմատ 2022-2023 թթ. 2,5 միլիարդով ավելացել է: Ակնհայտ է մեկ բան, որ քաղաքի բյուջեից շեշտակի մասհանում է կատարվել նախընտրական վերջին 2 տարում՝ քաղաքի աղբահանության խնդիրը իսպառ լուծելու համար: Անցավ նախընտրական տարին. 2024թ. հատկացումները կրկին իջեցրել են՝ մոտավորապես 5 միլիարդ դրամ: 2023թ. համեմատ աղբահանության տրամադրված բյուջեն պակասել է 2,5 միլիարդով: Հարց է առաջանում՝ ինչո՞ւ: 125 միլիարդ դրամանոց բյուջեի վրա տնօրինություն անող քաղաքային ադմինիստրացիան 2,5 միլիարդ կրճատում է աղբահանությունից, նաև ասֆալտապատման համար հուլիս ամսին գնում է կառավարության դուռը և ասում է՝ մի 2,5 միլիարդ փող կտա՞ս ասֆալտ անեմ Երևանում: Հարց է առաջանում. որ դու քաղաքի երկու ամենակարևոր բաների՝ աղբահանության և ասֆալտապատման համար իբրև թե փող ես տնտեսում, 125 միլիարդանոց բյուջեն ո՞ւր և ինչի՞ համար է գնում»: