«Պետական համակարգը ցնցումների ենթարկելը երբեք արդարացված չէ»․ Տիգրան Արզաքանցյան

«Վերջին օրերի ընթացքում կամավոր, թե հարկադրաբար իրենց հրաժարականներն են ներկայացրել մի շարք բարձրաստիճան պաշտոնյաներ, ներառյալ՝ ուժային և դատական կառույցների ղեկավարներ։ Անհասկանալի է նման կտրուկ քայլերի իրական պատճառը և ընտրված ժամանակի նպատակահարմարությունը»,- այս մասին ֆեյսբուքյան իր էջում գրառում է կատարել «Ուժը Հայրենյաց» կուսակցությունը։

«Իշխանությանները չպետք է մոռանան, որ ընտրվել են ժողովրդի քվեով, ուստի պետք է պահպանեն որոշումների ընդունման թափանցիկություն և հաշվետու լինեն ժողովրդի առջև։ Եթե այդ պաշտոնատար անձինք ազատվել են իրենց պարտականությունները ոչ պատշաճ կատարելու պատճառով, այլ ոչ կամայական որոշմամբ, ապա օրենսդրությամբ սահմանված կարգով պետք է պատասխանատվության ենթարկվեն, որի վերաբերյալ պետք է տեղեկացնել հանրությանը։

Անկախ պատճառներից՝ առավել կարևոր է թափուր պաշտոնների համալրման հարցը։ Ի՞նչ սկզբունքով է իրականացվելու կադրային քաղաքականությունը, ովքե՞ր են զբաղեցնելու պետության համար ռազմավարական և անվտանգային նշանակության կարևորագույն հաստիքները։ Հաշվի առնվելու է արդյո՞ք թեկնածուների արհեստավարժությունը, աշխատանքային փորձը և գիտելիքները կոնկրետ ոլորոտում, թե՞ կատարվելու է ձևական տեղափոխում՝ հաշվի առնելով միայն քաղաքական լոյալությունը։

Պաշտոնների նշանակման և ազատման կադրային քաղաքականությունը պետք է համապատասխանի ոլորտի ռազմավարական նպատակներին և չպետք է իրականացվի կամայական և իմպուլսիվ ձևով։ Պետությունն ու պետական համակարգը անընդհատ ցնցումների ենթարկելը երբեք արդարացված չէ և հիմնական խնդիրներից ուշադրությունը շեղելու տպավորություն է ստեղծում»,- նշված է գրառման մեջ։