«Եթե Փաշինյանը ձգում է «կվադրոբերների» գյամերը, չի նշանակում, թե «ուսապարկերին» պետք է տա դրախտային իրավիճակ»․ Արգիշտի Կիվիրյան

«Նիկոլ Փաշինյանը մշտապես փորձել է սոցցանցերով կառավարում իրականացնել, առավելագույնս փորձել է սոցիալական հարթակները միշտ օգտագործել»,- այս մասին «Նյուզ»-ի եթերում նշել է վերլուծաբան Արգիշտի Կիվիրյանը՝ անդրադառնալով sms-ներով պաշտոնանկությունների վերաբերյալ դիտարկմանը։

«Այս դարում ամբողջ աշխարհում ընդունված է սոցիալական ցանցերի օժանդակությամբ կառավարում իրականացնելը․․․ Դա ինչ-որ տեղ ապահովում է արդյունավետ կապ հասարակության հետ, և դրան զուգահեռ՝ ապահովում է հասարակության մոլորեցում։ Նիկոլ Փաշինյանը դրանք փորձում է առավելագույնս օգտագործել, բայց դա նոր չէ»։

Անդրադառնալով հարցին, թե ինչո՞ւ է Փաշինյանը պատգամավորներին ևս պարտադրում մանդատը վայր դնել, Կիվիրյանը պատասխանել է․ «Նիկոլ Փաշինյանը երբեք չի առաջնորդվել իրավականով, այնպես չէ, որ ինքը նոր է անցնում այդ գծերը․ մի մարդ, որը կոչ էր անում փակել դատարանների դռները, դրանից առաջ ռադիոտան դուռ էր ջարդում, նոր չէ, որ այդպիսի վարքագիծ է դրսևորում․․․

Փաշինյանն ունի 2 հենարան՝ օրենսդիրը և գործադիրը․ օրենսդիրը հայտնի «ուսապարկերն» են, գործադիրն էլ կարելի է բնորոշել որպես «կվադրոբերներ»։ Իր ամեն մի «ֆասով» այդ մարդիկ պատրաստ են իրականացնել ցանկացած ապօրինություն։ Եթե այս պարագայում ինքը ձգում է «կվադրոբերների» գյամերը, դա չի նշանակում, թե «ուսապարկերին» պետք է տա դրախտային իրավիճակ, հակառակը՝ երկու կողմերին էլ ինքը փորձում է ցույց տալ, որ պետք է ենթարկվեն իրեն»։

Դիտարկմանը, որ Նարեկ Զեյնալյանը հեշտ ենթարկվեց, Հովիկ Աղազարյանը համառում է, Կիվիրյանն արձագանքել է․ «Հին դաշնակ է, երևի պահի տակ դաշնակցականի արյունն է խոսում Աղազարյանի մեջ»։