Storm Shadow-ն ոչնչացրել է հարյուրավոր հյուսիսկորեացի զինվորների, սպաների և գեներալի

2859

Շաբաթ, 23 նոյեմբերի, 2024 թ., 20:54

Ուկրաինայի պաշտպանության ուժերը Storm Shadow հրթիռներով նոյեմբերի 20-ին հարձակվել են Ռուսաստանի Կուրսկի շրջանի Մարինո գյուղի ստորգետնյա հրամանատարական կետի վրա, որում, ի թիվս այլոց, եղել են բարձրաստիճան հրամանատարներ:

Այս հարձակման արդյունքում ոչնչացվել են ռուս գեներալ-լեյտենանտ Վալերի Սոլոդչուկը, ռուսական բանակի 18 սպա, ինչպես նաև 500 հյուսիսկորեացի զինվոր, ովքեր ժամանել էին Ռուսաստան՝ մասնակցելու Ուկրաինայի դեմ պատերազմին։ Այս մասին հայտնում է Global Defense Corp պորտալը՝ հղում անելով աղբյուրին։

Գեներալ Սոլոդչուկը ծառայում էր՝ որպես Լենինգրադի ռազմական օկրուգի հրամանատարի առաջին տեղակալ։
Բացի այդ, վիրավորվել է 33 ռուս զինվոր։ Վիրավորվել են նաև հյուսիսկորեացի երկու սպա և մի կին, ով, ենթադրաբար, թարգմանիչ է: Զոհված ռուս սպաների մեծ մասը Հարավային և Արևելյան ռազմական շրջանների ներկայացուցիչներ են եղել:

Մինչդեռ Reuters-ը հայտնում է, որ Ուկրաինան շարունակում է վերահսկել 800 քառ. կմ Ռուսաստանի Կուրսկի մարզում։ Ուկրաինայի Գլխավոր շտաբում գործակալության աղբյուրի տվյալներով՝ Ուկրաինայի զինված ուժերի կողմից վերահսկվող տարածքը կրճատվել է մոտավորապես 40%-ով՝ 1376-ից հասնելով 800 քառակուսի կիլոմետրի։