«Հեռո՞ւ է Մինսկը, թե՞ ոչ ոք չի կարող ձեր տեղափոխումն իրականացնել»․ Լուկաշենկոն՝ Փաշինյանին

Եվրասիական տնտեսական բարձրագույն խորհրդի ընդլայնված կազմով նիստին տեսակապի միջոցով մասնակցող ՀՀ վարչապետ Նիկոլ Փաշինյանն ասաց, որ 2025թ․ մայիսին Մինսկում կայանալիք ԵԱՏՄ գագաթնաժողովին ՀՀ-ն կրկին տեսակապով կմասնակցի։ Ի պատասխան՝ Բելառուսի նախագահ Ալեքսանդր Լուկաշենկոն հեգնեց՝ ինչո՞ւմն է խնդիրը, հեռո՞ւ է Մինսկը, մենք կարող ենք ձեր պատվիրակության տեղափոխումը կազմակերպել։

Փաշինյանն արձագանքեց, որ այդ առնչությամբ իր որոշման մասին ավելի վաղ հայտարարել էր, այն ուժի մեջ է: Լուկաշենկոյի արձագանքին, թե իրենք կդիտարկեն այդ հայտարարությունը, ՀՀ վարչապետը պատասխանեց, որ այն ենթակա չէ դիտարկման: «Միգուցե հեռուստացույց չլինի, հնարավոր չլինի հեռակապով միանալ»,- ասաց Լուկաշենկոն։ «Ոչ մի խնդիր»,- պատասխանեց Փաշինյանը։

Ավելի վաղ Լուկաշենկոն, դիմելով Փաշինյանին, ասել էր․ «Մենք գիտենք, որ դուք ոչ միայն սափրվել եք, այլ նաև մի փոքր հիվանդացել եք»։