Վահե Հովհաննիսյանը՝ շրջհարկի փոփոխության մասին

ՀՀ ֆինանսների նախարար Վահե Հովհաննիսյանը լրագրողների հետ զրույցում անդրադարձավ շրջանառության հարկի փոփոխությանը՝ նշելով․ «Ավելացման որոշումը կայացվել է դեռևս մայիսին։ Այդ ժամանակ բավականին հանգիստ քննարկումներ ենք ունեցել, հանրությանն էլ բացատրել ենք, թե ինչով է այն պայմանավորված։ Բացատրել ենք, որ պարտաճանաչ ծախսագրումներ իրականացնելու պարագայում շրջանառության հարկ վճարողների տոկոսադրույքները, հարկային բեռը չի ավելանալու։ Դժգոհում են այն մարդիկ, ովքեր այդ ծախսերը գրանցելու, հիմնավորելու, ծախսը հաստատող փաստաթղթեր վերցնելու հետ կապված խնդիրներ ունեն։ Եթե տնտեսվարողները առաջ առանց որևէ ծախս հիմնավորող փաստաթուղթ ունենալու ձեռնարկություն ունեին, հիմա ստիպված են նոր գործողություններ անել, որպեսզի այդ փաստաթղթերն ունենան։ Պետք է համակերպվել, քանի որ բոլորս էլ ուզում ենք ստվերը կրճատվի»,- ասաց նախարարը։
Հիշեցնենք, որ այս պահին կառավարության շենքի դիմաց շրջհարկի բարձրացման դեմ բողոքի ակցիա են իրականացնում Ոսկու շուկայի աշխատակիցները։
Հիշեցնենք, որ «ՀՀ հարկային օրենսգրքում փոփոխություններ և լրացումներ կատարելու մասին» նախագիծը ՀՀ կառավարության հավանությանն է արժանացել մայիսի 2-ի նիստում։

Շրջանառության հարկի դրույքաչափերի բարձրացման և փաստաթղթավորման խթան­ների վերաբերյալ առաջարկվել է՝

• գործունեության հիմնական տեսակների մասով բարձրացնել (հիմնականում՝ կրկ­նակի չափով) շրջանառության հարկի՝ ներկայումս գոր­ծող դրույքա­չափերը,
• ընդլայնել փաս­տա­թղթե­րով հիմնա­վորված ծախ­սերի հիման վրա շրջանառության հարկի գումար­ի նվա­զեց­ման հնարավորությունների շրջանակը՝ այն նախատեսելով նաև արտադ­­րության և ծառայությունների ոլորտների համար (ներկայումս այդ հնարավորությունն առկա է միայն առևտրի և հանրային սննդի կազմակերպման ոլորտների համար),
• հնարավորություն ստեղծել, որպեսզի ձեռքբերումների փաստաթղթավորման բարձր մակար­դակ ապահովող հարկ վճարողների համար շրջանառության հարկի վերջնական (արդյու­նավետ) դրույքաչափը գործնականում լինի ավելի ցածր, քան գործող դրույքաչափերն են:

Գործունեության տեսակների վերաբերյալ առաջարկվել է սահմանել, որ 2025թ. հունվարի 1-ից՝ փաստաբանական և նոտարական գոր­ծու­նեու­թյան տեսակները չեն կարող իրակա­նաց­վել շրջանառության հարկի համակար­գում (պետք է տեղափոխվեն ԱԱՀ-ի համակարգ),
հետևյալ գործունեության տեսակները չեն կարող իրականացվել միկրո­ձեռնար­կա­տի­րու­թյան համակարգում (պետք է տեղափոխվեն շրջանառության հարկի կամ ԱԱՀ-ի համա­կարգ), մարզերում առևտրական (առք ու վաճառքի) գործունեությունը, վար­սա­վիրա­կան, մարմնի խնամքի ծառայությունների մատուցումը, սաունաների, բաղնիքների և շոգե­բաղնիքների կազմակերպման գործու­նեու­թյունը,
ավտոմեքենաների տեխնիկական սպասարկման և նորոգման ծառայությունների մատու­­ցումը, միջնորդական այդ թվում՝ անշարժ գույքի առքու­վաճառքի և կամ վար­ձա­կա­լու­թյամբ կամ անհատույց օգտա­գործ­ման տրամադրման գործունեությունը, ծրագրային ապահովման մշակման գործունեությունը, փորձաքննական ծառա­­յու­թյունների մատուցումը, շինարարական աշխատանքների կատարումը, ճարտա­րա­պե­տա­կան նախա­­­գծա­յին փաստա­թղթերի մշակման աշխա­­­­­տանքների իրա­կա­նացումը, անշարժ գույքի գնահատման և չափագրման գոր­ծու­նեու­թյան իրակա­նաց­ումը: