«Մի փոքր դահլիճում հավաքել է մի քանի հոգու, անունը դրել հայ համայնք». Սևակ Հակոբյան

Լրագրող, խմբագիր Սևակ Հակոբյանի թելեգրամյան գրառումը. «2019թ․ սեպտեբերի 23-ին ԱՄՆ-ում՝ Լոս Անջելեսի կենտրոնում գտնվող Գրանդ Փարքում, հանրահավաք արեց Նիկոլ Փաշինյանը։ Իհարկե, բազմահազար հայություն ունեցող Լոսի համար քիչ մարդ էր մասնակցում, բայց, այնուամենայնիվ, մեծ հանրահավաք էր։ էլի խոստումներ, էլի սիրում եմ ձեզ, հպարտանում եմ ձեզնով։ 8 էջանոց ելույթ ունեցավ, Պարույր Սևակից բանաստեղծություն արտասանեց, մի հատ էլ իր գրած ոտանավորներից։
Շատ երկար գովեց Սփյուռքը, շնորհակալութուն հայտնեց Սփյուռքի անհատներին, բարերարներին, Հայ դատին, Հայ օգնության միությանը և այլ՝ մի շարք կառույցներին, որ կանգնած են Արցախի թիկունքին։ Գովեց համահայկական հիմնադրամին նվիրատվությունները, գովեց եկեղեցուն, անգնահատելի աշխատանքի համար։ Շնորհակալություն հայտնեց Քըրք Քըրքորյանի «Լինսի» հիմնադրամին, որով Հայաստանում կառուցվել են ճանապարհներ, դպրոցներ, մշակութային օջախներ։ Ասաց, թե՝ այսօր Հայաստանի կառավարությունն ի վիճակի է Լինսի հիմնադրամի չափ կառուցել։ Ի միջի այլոց, ասեմ, Լինսի հիմնադրամը անհատույց գումարներ էին, որ նախագահ Քոչարյանը, իր անձնական հեղինակության շնորհիվ, կարողացավ ներգրավել քայքայված ենթակառուցվածքներ նորոգելու և կառուցելու համար․ Փաշինյանի կառավարությունը դրանք անում է վարկերով, անում է անորակ։
Հետ գամ հանրահավաքին․ ասաց՝ հայ լինելը հետաքրքիր է, ամեն հայ պետք է Հայաստանում տուն ունենա, ՀՀ քաղաքացիություն, պետք է ներգաղթ լինի, ամեն սփյուռքահայ բիզնես ունենա Հայաստանում և այլն։
Նիկոլը դարձյալ ԱՄՆ-ում է, իր նախորդ հանրահավաքում ասած էդ անհատներն էլ իր կողքին չեն, էն կազմակերպությունները, որոնց շնորհակալություն էր հայտնում, իր հրաժարականն են պահանջում, Արցախը, որին այնքան օգնել էր Սփյուռքը, ու որի համար շնորհակալություն էր հայտնում, ինքն էլ հենց հանձնել է, եկեղեցու հետ հարաբերությունները վատ են, հայրենադարձություն տեղի չի ունեցել, սփյուռքահայերը ավելի շատ ներդրում են հանել Հայաստանից, քան բերել են, Համահայկական հիմնադրամի նկատմամբ վստահությունը փոքրացրել է՝ հանգանակությունները մտցնելով բյուջե ու դարձնելով պարգևավճարներ, ու ինքը այս անգամ ոչ թե ԱՄՆ-ում հանրահավաք է անում, այլ մի փոքր դահլիճում հավաքել է մի քանի հոգու, անունը դրել հայ համայնք ու խոսում է․ խոսում է հաշտվելու, գոյատևելու, հանձնելու մասին»։