«Արամ Սարգսյանը գիտեր՝ Վազգենի սպանությունից հետո միակն էի, որ տարածքները կկարողանայի պահել, բայց ինձ հեռացնելու հարց դրեց»․ Սամվել Բաբայան

«Ես ընդհանրապես տեղյակ չեմ, ինձ հետ որևիցե մեկն այդ հարցը չի քննարկել։ Միգուցե արդեն ինձ հեռացնելու ծրագիր էին իրականացնում, դրա համար ինձ հետ չեն քննարկել»,- այս մասին «Ֆակտոր»-ի հետ զրույցում նշեց Արցախի ՊԲ նախկին հրամանատար, Անվտանգության խորհրդի նախկին քարտուղար Սամվել Բաբայանը՝ անդրադառնալով Մեղրիի և Լեռնային Ղարաբաղի փոխանակման պլանին և այդ պլանի վերաբերյալ ԱՄՆ Պետքարտուղարության գաղտնազերծմանը։
«99թ․ դեկտեմբերի 15-17-ը ես հեռացել եմ։ 99թ․ օգոստոսին ինձ հետ կոնֆլիկտ էր եղել Ղարաբաղում, դրանից հետո ես հեռացա՝ դեկտեմբերին։ Ես տեղյակ չեմ ինչից են խոսում ամերիկացիներն ընդհանրապես կամ Ալիևի առաջարկը որն է եղել․․․ Ես գիտեմ, որ այն ժամանակ ես պաշտպանության բանակի հրամանատար, նախարար էի և 110կմ, այդ թվում Մեղրին՝ 43կմ, իմ ենթակայության տակ էր, և առանց ինձ հետ խոսելու 110կմ ո՞նց էին հանձնելու, ես չեմ պատկերացնում։ Ուրեմն, նախապես պլանավորված է եղել իմ հեռացումը, հակառակ դեպքում՝ ինչո՞ւ չէին ինձ հետ քննարկել,- նշեց Բաբայանը՝ ընդգծելով, որ եթե քննարկեին, իհարկե, դեմ կլիներ Մեղրին տալուն, քանի որ «Արցախը դե ֆակտո միացած էր Հայաստանին, ճիշտ քաղաքականություն էր պետք վարել և դե յուրե պատրաստվել, ոչ թե բանակը քանդել, զբաղվել թալանով, ինչն էլ բերեց նոր պատերազմի»։
Բաբայանը նաև հավելեց, որ 99թ․ ՀՀ քաղաքական դաշտը անվտանգության նիստ է հրավիրել․ Արցախի գործող իշխանության հետ ՀՀ կառավարությունը խնդիր է դրել՝ Բաբայանը պետք է հեռանա։
«Պրովոկացիան արեցին, հեռացրին։ Օրինակ՝ Արամ Զավենի Սարգսյանը ամեն տեղ ասում է՝ Մեղրին հանձնում էին սրանք։ Նա առաջիններից մեկն էր, որ այդ Անվտանգության խորհրդի նիստում իմ հեռացման հարցն է դրել՝ Արկադի Ղուկասյանի, մյուսների հետ պայմանավորված, պատճառաբանելով, թե Բաբայանն ապտակել է Ղարաբաղի վարչապետին, վաղն էլ մեզ կապտակի։ Ուրիշ պատճառ չուներ։ Ինքը շատ լավ գիտեր, որ Վազգենի սպանությունից հետո միակ անձն էի, որ կարող էի այդ տարածքները պահպանել, ու ասում է՝ պետք է հեռացնել։ Արամ Սարգսյանը կողմ չի եղել Մեղրին հանձնելուն, բայց չհասկանալով՝ թուլացրել է բանակը, և ինքը համարում է, որ ինքը ճիշտ է։ Չեն ասում՝ մենք սխալվել ենք 99թ․․․ Չէր կարելի, որ պատերազմը դեռ ընթանում էր, հա, մի փոքր դադար էր, ու դուք բանակի գլուխը կտրում եք, ինչի՞ համար, ձեր ամբիցիաների՞, ձեր ամբիցիաներն ավելի բարձր են, քան պետությո՞ւնը։ Լռե՛ք»։