«Հայաստանը պետք է հետևի Բալթյան երկրների օրինակին»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը. «Փետրվարի 8-ին Լիտվան, Լատվիան և Էստոնիան ընդմիշտ անջատվելու են ռուսական էլեկտրացանցից՝ վերջ դնելով տասնամյակների կախվածությանը։ Այս քայլը նրանց համար ոչ միայն տեխնիկական, այլև ռազմավարական ու քաղաքական հաղթանակ է։ Բալթյան երկրները տարիներ շարունակ աշխատել են իրենց էներգետիկ անկախությունը հաստատելու ուղղությամբ՝ ներդնելով շուրջ 1.6 միլիարդ եվրո ենթակառուցվածքների զարգացման համար։ Այդ գումարի զգալի մասը տրամադրել է Եվրոմիությունը՝ որպես աջակցություն էներգետիկ ազատության հասնելու համար։
Այս անցումը հնարավոր դարձավ այնպիսի նախագծերի շնորհիվ, ինչպիսիք են NordBalt (Լիտվա-Շվեդիա) և LitPol Link (Լիտվա-Լեհաստան) էլեկտրահաղորդման գծերը, որոնք նրանց հնարավորություն են տալիս էլեկտրաէներգիա ստանալ եվրոպական աղբյուրներից։ Սա նշանակում է, որ Ռուսաստանն այլևս չի կարող էներգիան օգտագործել որպես քաղաքական ճնշման գործիք։
Հայաստանը ևս պետք է որդեգրի նմանատիպ ռազմավարական ուղի՝ նվազեցնի և հեռանկարում ամբողջությամբ վերացնի էներգետիկ կախվածությունը Ռուսաստանից։ Հայաստանը պետք է խորացնի էներգետիկ համագործակցությունը Եվրոմիության և ԱՄՆ-ի հետ, որի հիմքը դրվել է 2024 թվականի ապրիլի 5-ին ԵՄ-Հայաստան-ԱՄՆ բարձր մակարդակի հանդիպման արդյունքում ընդունված հայտարարությամբ, ինչպես նաև 2025 թվականի հունվարի 14-ին ստորագրված հայ-ամերիկյան ռազմավարական գործընկերության խարտիայով։
Ռուսական էներգետիկ գերիշխանությունը հավասարազոր է քաղաքական կախվածության, իսկ դրա վերացումը՝ իրական ինքնիշխանության։ Էներգետիկ անկախությունը կբերի նույն քաղաքական արդյունքը, ինչ ՀԱՊԿ-ից կամ ԵԱՏՄ-ից դուրս գալը՝ Հայաստանը կդառնա ինքնուրույն որոշումներ ընդունող երկիր՝ առանց արտաքին ճնշումների։
Հայաստանը պետք է ներգրավի արևմտյան էներգետիկ տեխնոլոգիաները՝ հատկապես ամերիկյան փոքր մոդուլային ռեակտորային լուծումները (SMR), որոնք ապացուցված են որպես կայուն և անվտանգ էներգիայի աղբյուր։ Երկիրը պետք է կառուցի նոր ատոմակայան, որը կհամապատասխանի արևմտյան ստանդարտներին և կապահովի ոչ միայն ներքին սպառումը, այլև Հայաստանի վերածումը տարածաշրջանային էներգետիկ կենտրոնի։
Հայաստանը պետք է արտադրի այնքան էլեկտրաէներգիա, որ կարողանա այն վաճառել ոչ միայն Վրաստանին և Իրանին, այլև Թուրքիային և Ադրբեջանին, որոնք մշտապես ունեն էներգիայի դեֆիցիտ։ Սա ոչ միայն տնտեսական մեծ հնարավորություն է, այլև ռազմավարական նշանակության քայլ, որը թույլ կտա տարածաշրջանում փոխկապակցվածություն ստեղծել Հայաստանի օգտին։
Հայաստանը պետք է հետևի Բալթյան երկրների օրինակին՝ վերացնելով ռուսական էներգետիկ կախվածությունը, ներգրավելով արևմտյան տեխնոլոգիաները և դառնալով տարածաշրջանային էներգետիկ կենտրոն։ Իրական անկախություն և անվտանգություն ունենալու համար անհրաժեշտ է վճռական քաղաքական կամք և ռազմավարական հեռատեսություն»։