«Որքան ՀՀ-ն թևակոխում է բարեփոխումների փուլ, այդքան ընդդիմադիրները վարկաբեկում են գործընթացները». ՔՊ-ական պատգամավոր Ալխաս Ղազարյան

Մեր հանրապետության դեմ իրականացվում է հիբրիդային պատերազմ, փորձ են անում խաթարել մեր երկրի տնտեսական, քաղաքական և հասարակական կայունությունը, ԱԺ ամբիոնից իր ելույթում նշեց ՔՊ-ական պատգամավոր Ալխաս Ղազարյանը: Ըստ նրա, այդ պայքարը փաթեթավորվում է հանուն Կիրանցի համար պայքարով, շրջանառության հարկի դեմ պայքարով, տրանսպորտի թանկացման դեմ բողոքով, հայտարարագրերի դեմ պայքարով:

«Որքան Հայաստանը թևակոխում է բարեփոխումների վճռորոշ փուլ, ամրապնդում իր ինքնիշխանությունը և վարում է դիվերսիֆիկացված արտաքին ու անվտանգային քաղաքականություն, այդքան ընդդիմադիր ուժերը փորձում են մանիպուլյացիաների և կեղծ տեղեկատվության միջոցով ստվերել և վարկաբեկել ընթացող գործընթացները։ Նրանք գիտակցում են, որ բարեփոխվող, կայուն զարգացող, ինքնիշխան ու հաջողություններ գրանցող Հայաստանը նրանց անհաջողությունների գլխավոր պատճառն է»,- ասաց նա՝ ակնարկելով ընդդիմությանը: