«Օր օրի գահավիժող վարկանիշն արձանագրելու է ՔՊ-ի պարտությունը Գյումրիում»․ Կարեն Մալխասյան

Գյումրու ավագանու «Ապրելու երկիր» խմբակցության ղեկավար Կարեն Մալխասյանի ֆեյսբուքյան գրառումը․ «Արդեն պաշտոնապես նշանակվեցին Գյումրու ավագանու արտահերթ ընտրությունները։
Փաստենք, որ այս արտահերթ ընտրությունները քաղաքային նախորդ իշխանությունների նկատմամբ ՔՊ-ի իշխանազավթման վարքագծի հետևանք է, որը շարունակվում է մինչև օրս։
Վարչական ռեսուրսի բացահայտ և թաքնված կիրառում, ընդդիմադիր թեկնածուների նկատմամբ ճնշումներ, կեղծ հակաքարոզչություն․ սրանք ՔՊ-ի իշխանազավթման փորձերի գործիքակազմի մի մասն են ընդամենը։
Այս ամենը խոսում է այն մասին, որ ՔՊ-ի օր օրի գահավիժող վարկանիշը Գյումրիում և Հայաստանում արձանագրելու է ՔՊ-ի պարտությունը Գյումրիում։
Միևնույն ժամանակ, շատ կարևոր է, որ գյումրեցին հստակ իմանա բոլոր ուժերի վարքագիծը հետընտրական գործընթացներում՝ կարևորելով ՔՊ-ի հետ ուղղակի կամ անուղղակի համագործակցության բացառումը։
Վստահ եմ, որ գյումրեցիների հետ միասին մեր քաղաքը կազատենք քպ-ական այս կարճաժամկետ իշխանազավթումից»։