«Սա միայն օրվա հացի խնդիր չէ, համալիր խնդիրների լուծում է պահանջվում»․ Արամ Գրիգորյան

«Չնայած, որ ՀՀ մեր հայրենակիցները գրկաբաց ընդունել են արցախահայությանը, մտահոգված էին մեր խնդիրներով, այնուամենայնիվ, այս իշխանության կողմից մեր խնդիրները համապատասխան լուծումներ չեն ստացել։ Օրեցօր արցախահայությունը հայտնվում է անելանելի վիճակում»,- այս մասին Ազատության հրապարակում Արցախցիների իրավունքների պաշտպանության խորհրդի ներկայացուցիչների հետ հանդիպումից հետո լրագրողների հետ զրույցում ասաց «Ազատ հայրենիք-ՔՄԴ» խմբակցության ղեկավար Արամ Գրիգորյանը։

Նրա խոսքով՝ հենց այդ խնդիրներն են ստիպել արցախահայերին՝ բողոքի ձայն բարձրացնելու։

«Միասնականությունը, որը ձևավորված է, ուղղված են արցախահայերի իրավունքների պաշտպանությանը, որի մեջ մտնում են ինչպես սոցիալական, այնպես էլ կոլեկտիվ վերադարձի, գերիների և առհասարակ Արցախի հարցերը»,- հավելեց քաղաքական գործիչը։

Անդրադառնալով Արցախցիների իրավունքների պաշտպանության խորհրդի հետ հանդիպման ընթացքում քննարկված հարցերին, Գրիգորյանը նշեց․ «Սա միայն օրվա հացի խնդիր չէ, համալիր խնդիրների լուծում պահանջող հարց է։ Մենք տարբեր հարթակներում փորձել ենք 2023թ,-ից բարձրացնել այս խնդիրները, սակայն լուծում դեռ չենք ստացել»։