«Ուկրաինային աջակցելու ԵՄ քաղաքականությունը կհանգեցնի Եվրոպայի սնանկացմանը»․ Օրբան

3358

Ուրբաթ, 02 մայիսի, 2025 թ., 12:45

Ուկրաինային ռազմական աջակցությանն ուղղված ԵՄ ղեկավարության քաղաքականությունը, ինչպես նաև ԵՄ-ին այդ երկրի անդամակցությանն ուղղված ծախսերը կհանգեցնեն Եվրոպայի սնանկացմանը։ Այս մասին հայտարարել է Հունգարիայի վարչապետ Վիկտոր Օրբանը։

«Եվրոպայի, այդ թվում՝ մեր փողերը, սայլերով Ուկրաինա է տեղափոխվում, իսկ ԵՄ տնտեսությունը միջոցների սուր պակաս է զգում», ասել է կառավարության ղեկավարը։ Նրա խոսքով՝ ո՛չ Հունգարիան, ո՛չ էլ ԵՄ-ն նման խնդիրներ չէին ունենա, «եթե Ուկրաինա ուղարկված գումարը ներդրվեր եվրոպական տնտեսության մեջ»։

Այնուամենայնիվ, ԵՄ առաջնորդները մտադիր են շարունակել Ուկրաինային ռազմական աջակցությունը՝ նույնիսկ առանց ԱՄՆ-ի մասնակցության, չնայած պարզ է, որ Եվրոպան չի կարող դա անել միայնակ, ընդգծել է Օրբանը՝ հիշեցնելով, որ Կիևը ցանկանում է ունենալ 1 միլիոնանոց բանակ։

Բացի այդ, ԵՄ առաջնորդները փորձում են ապահովել Ուկրաինայի արագացված անդամակցությունը ԵՄ՝ մինչև 2030 թվականը, նշել է վարչապետը։ Այս գործընթացը ֆինանսավորելու համար Բրյուսելը նախատեսում է «հսկայական վարկ վերցնել, որը կհանգեցնի ԵՄ պարտքի առաջացմանը», ասել է Օրբանը։

«ԵՄ-ին այս երկրի անդամակցությունը կկործանի եվրոպական տնտեսությունը», - զգուշացրել է Օրբանը։