«Հանքանյութերի գործարքից շահույթ ստանալու համար ավելի քան 10 տարի կպահանջվի»․ #Reuters

Ուկրաինան և Միացյալ Նահանգներն ստիպված կլինեն ավելի քան մեկ տասնամյակ սպասել հանքարդյունաբերության գործարքից ֆինանսական օգուտ քաղելու համար, հայտնել է Reuters-ը։

Զարգացած հանքարդյունաբերություն ունեցող երկրներում, ինչպիսիք են Կանադան կամ Ավստրալիան, ռազմավարական նշանակություն ունեցող ռեսուրսներով հանքերի շահագործումը տևում է 10-20 տարի, գրում է գործակալությունը՝ հղում անելով փորձագետներին։ Ուկրաինայում որոշ հանքավայրերի մշակման տնտեսական նպատակահարմարությունը հիմնավորող տվյալները քիչ են։ Գոյություն ունի նաև ռիսկ, որ ներդրողները չեն ցանկանա ներդրումներ կատարել մի երկրում, որի ենթակառուցվածքները, տրանսպորտը և էներգետիկան վնասվել են մարտական ​​գործողությունների հետևանքով։

«Եթե որևէ մեկը կարծում է, որ այդ բոլոր հանքանյութերը Ուկրաինայից կթռչեն այստեղ, երազանքների է տրվում», - ասել է Benchmark Minerals Intelligence խորհրդատվական ընկերության ներկայացուցիչ Ադամ Ուեբը։

Մասնագետի խոսքով՝ «իրականությունն այն է, որ դժվար կլինի արդարացնել Ուկրաինայում գումար ներդնելը, երբ կարելի է ներդրումներ կատարել խիստ կարևոր ռեսուրսներ ունեցող այն երկրներում, որոնք պատերազմի մեջ չեն»։