«Բանակցում ենք վարչապետի 4 թեկնածուի հետ, ով համաձայնի՝ կառաջադրենք»․ Հովիկ Աղազարյան

«Էդգար Ղազարյանի և Նարեկ Մալյանի նամակներին՝ Նիկոլ Փաշինյանին անվստահություն հայտնելու գործընթացի վերաբերյալ, մենք կպատասխանենք հրապարակավ»,- «Փաստինֆո»-ի հետ զրույցում այս մասին նշեց ԱԺ պատգամավոր Հովիկ Աղազարյանը՝ հավելելով՝ մեր պատասխանը կլինի ուրբաթ՝ կուսակցության վարչության նիստից հետո։

Անդրադառնալով դիտարկմանը, որ պարբերաբար հայտարարել է՝ չի միանալու որևէ գործընթացի, որում ներգրավված կլինեն Ռոբերտ Քոչարյանի և Սերժ Սարգսյանի թիմերը, Աղազարյանը պատասխանեց․ «Պատիվ ունեմ» և «Հայաստան» դաշինքները հայտարարել են, որ պատրաստ են միանալ ցանկացած նախաձեռնության, բայց թեկնածու չեն առաջադրելու, հետևաբար՝ Աստված մեզ փրկեց էդ փորձությունից․․․ Բացառիկ դեպքերը, եթե մի կողմ թողնենք, մենք պնդում ենք, որ չենք միանալու Քոչարյանի և Սարգսյանի առանցքի շուրջ հավաքված ուժերին․․․ Բայց մեր նպատակն է ամեն ինչ անել, որ Նիկոլ Փաշինյանը չվերարտադրվի՝ որպես ՀՀ վարչապետ»։

Աղազարյանը հավելեց, որ իրենք վարչապետի թեկնածուի փնտրտուքի մեջ են։
«Մենք այս պահին բանակցում ենք 4 հոգու հետ, որոնց թեկնածությունը կարող ենք առաջադրել վարչապետի պաշտոնում։ 4-ից ով էլ համաձայնի, մենք կքննարկենք նրա թեկնածությունը մեր կուսակցության վարչությունում և կառաջադրենք։ Նրանք պատվարժան, փորձառու, բավականին չեզոք անհատներ են»,- նշեց Աղազարյանը՝ հավելելով, որ թեկնածուներից 2-ը կարող են ընդունելի լինել և՛ խորհրդարանական ընդդիմության, և՛ ՔՊ պատգամավորների համար։