ՆԱՏՕ-ի գլխավոր քարտուղարը կոչ է արել Գերմանիային` չխոչընդոտել Թուրքիային` գնել կործանիչներ

ՆԱՏՕ-ի գլխավոր քարտուղար Մարկ Ռյութեն մեկնել է Թուրքիա՝ մասնակցելու հյուսիսատլանտյան դաշինքի արտաքին գործերի նախարարների ոչ պաշտոնական հանդիպմանը։ Այցի շրջանակներում նա հարցազրույց է տվել Թուրքիայի պետական «Anadolu» լրատվական գործակալությանը։
Անդրադառնալով Թուրքիայի ռազմարդյունաբերությանը՝ ՆԱՏՕ-ի գլխավոր քարտուղարը նշել է, որ այն շատ կարևոր է դաշինքի համար։ Խոսելով «Eurofighter Typhoon» կործանիչներից՝ Ռյութեն նշել է, որ Գերմանիայի կանցլեր Ֆրիդրիխ Մերցի մասնակցությամբ կայացած մամուլի ասուլիսում կործանիչների վաճառքի վերաբերյալ կառուցողական բանակցություններ են եղել։

Միջանկյալ նշենք, որ Թուրքիան ցանկանում է գնել 40 միավոր «Eurofighter Typhoon» կործանիչ և դրանց ձեռքբերման համար աշխատանքներ են տարվել Իտալիայի, Իսպանիայի և Միացյալ Թագավորության հետ, սակայն Գերմանիան դեմ է այդ վաճառքին, գրում է «Էրմենիհաբեր»-ը։

Ռյութեի նշմամբ՝ գերմանական կողմի մոտեցումը նախորդների համեմատ ավելի դրական է եղել։

«Ես դաշնակիցներին հորդորում եմ սահմանափակումներ չդնել մի դաշնակցից մյուսին զենք վաճառելու վրա։ Նման բան չպետք է տեղի ունենա դաշինքի ներսում»,- ընդգծել է ՆԱՏՕ-ի գլխավոր քարտուղարը։