Սկանդալային տեսանյութ. «․․․ գնում եք և այլևս այստեղ չեք վերադառնում»․ Նորք Մարաշ ԲԿ-ի բժիշկները՝ վիրակապվող ծանր բուժառուին

Ինչպես արդեն տեղեկացրել էինք, Նորք Մարաշ ԲԿ-ում քաղաքացու տանջալից ու ողբերգական մահից հետո, քաղաքացիներն ահազանգում, տեսանյութեր և ձայնագրություններ են ուղարկում խմբագրություն։

Հանրությանն ենք ներկայացնում քաղաքացիների ուղարկած սկանդալային մի տեսանյութ (ԲԿ-ի 1-ին հարկ, դուպլեքս բաժնի ընդունարան-սպասասրահ և վիրակապարան), թե ինչպես են Նորք-Մարաշ սրտաբանական ԲԿ-ում Հիպոկրատի երդում տված «բժիշկները», իրենց վիրահատած բուժառուի հետվիրահատական ցավերին ի պատասխան, կոպիտ բառապաշարով հորդորում՝ «․․․ գնում եք և այլևս այստեղ չեք վերադառնում» (ներկայացնում ենք նաև տեսագրության սղագրությունը)։

Բուժառու - ես ասում եմ ձեզ, հայերեն, բերնեբերան ասում եմ՝ ձեռ մի տվեք վերքիս, մեռնում եմ։

Բժիշկ - դե ուրեմը մի եկեք ստեղ։

Բուժառու - էն գլխից ես սխալ հիվանդանոց մտա, խի՞ եկա էս անտեր հիվանդանոց, ես գիտեի, որ էս հիվանդանոց պտի չգայի։

Բժիշկ - սա լինի քո վերջին այցը, վիրակապությունը դնում ենք, գնում եք և այլևս այստեղ չեք վերադառնում։

Այս ԲԿ-ի և բուժանձնակազմի գործողություններին վերաբերող այլ տեսա-ձայնագրություններ խմբագրությունը կհրապարակի նաև առաջիկայում։

ՈՒՇԱԴՐՈՒԹՅՈՒՆ

Եթե Դուք (Ձեր հարազատները) ևս տուժել եք վերոնշյալ բժիշկների, կամ Նորք Մարաշ ԲԿ-ի այլ աշխատակիցների գործողություններից, կարող եք զանգահարել խմբագրության լրահավաք հեռախոսահամարին (010 55 20 59), կամ գրել (ուղարկել ձայնագրություններ, տեսագրություններ, այլ նյութեր) [email protected] լրահավաք հասցեին, կամ ֆեյսբուքի էջին։

Խմբագրությունը երաշխավորում է տեղեկատվություն տրամադրող անձի գաղտնիությունը։

Հիշեցնենք, որ ՄԱՄՈՒԼ․am լրատվականն անդրադարձել էր՝ Նորք Մարաշ ԲԿ-ի բժիշկներ՝ Գագիկ Հեբոյանի, Քրիստինե Պողոսյանի, Հովհաննես Ավդալյանի, Գագիկ Հապետյանի, Էդուարդ Պետրոսյանի, Արա Անանյանի դեմ ներկայացված հաղորդմանը, համաձայն որի՝ «սրտի բաց վիրահատությունից հետո լիարժեք ապաքինված քաղաքացին մահացել է բուժանձնակազմի՝ կյանքի համար վտանգավոր գործողությունների, իսկ ծայրահեղ ծանր վիճակում՝ անգործության հետևանքով», որի մասով հարուցվել է քրեական գործ։

Խմբագրությունն անդրադարձել է այս միջադեպին հետևյալ հոդվածներում՝

1) «Մահվան ելքով վիրահատությունից հետո հաղորդում է ներկայացվել բժիշկներ՝ Գագիկ Հեբոյանի, Քրիստինե Պողոսյանի, Հովհաննես Ավդալյանի, Գագիկ Հապետյանի, Էդուարդ Պետրոսյանի, Արա Անանյանի դեմ»,

2) «Նորք Մարաշ ԲԿ-ն քաղաքացու մահվանից 26 օր անց է միայն «ցավակցություն» հայտնում»,

3) «Նույն անձնակազմը ինձնից խլեց մայրիկիս»․ հանրությունը՝ ողբերգական միջադեպին մասնակից բժիշկների մասին հոդվածներով,

4) «Հարուցվել է քրեական գործ»․ Քննչական կոմիտեն՝ Գ․ Հեբոյանի, Ք․ Պողոսյանի, Ա․ Անանյանի, Է․ Պետրոսյանի, Հ․ Ավդալյանի, Գ․ Հապետյանի մասնակցությամբ մահվան ելքով դեպքի մասին: