«Ադրբեջանը երկարաժամկետ կամ կարճաժամկետ առումով ագրեսիվ ծրագրեր ունի»․ Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «Եթե Ադրբեջանն այսօր «արևմտյան ադրբեջան» զավթողական կոնցեպտը ներառել է հանրակրթական դպրոցներում, և ադրբեջանցի երեխաները մեծանում են՝ սովորելով, որ իրենց հարևանությամբ գտնվող Հայաստանն իրենց «պատմական հողն» է, ապա այսպես թե այնպես իրենք երկարաժամկետ կամ կարճաժամկետ առումով ագրեսիվ ծրագրեր ունեն։ Հիմա, եթե մենք այդ ամենը չենք ուզում տեսնել, դրանից իրողությունը չի փոխվում։ Այդ իրողությունն ահագնանում է, ավելի վտանգավոր է դառնում։ Եթե ժամանակին արձագանքեինք, հնարավոր էր կանխել։ Օրինակ՝ եթե 2,5 տարի աշխատեին ու ճիշտ գնահատականներ հնչեցնեին, այսօր կարող է Ալիևն ընդհանրապես ռիսկ չաներ այդ տերմինն օգտագործել։ Բայց ոչինչ չեն արել, հիմա էլ փորձում են արդարացնել Ադրբեջանի քայլերը, ասել՝ սովորեք, որ այդպես պետք է կոչեն Հայաստանի տարածքը։ Արդեն այդպիսի հայտարարություններ են անում Հայաստանի պաշտոնյաները։
Իսկ առհասարակ պատերազմը կանխելու պատմականորեն ապացուցված լավագույն ձեւը պատերազմին պատրաստ լինելն է, որ քո հակառակորդը ցանկացած իրավիճակում հասկանա, որ քեզ հետ խոսելը, բանակցելն ու պայմանավորվելն ավելի գերադասելի ու ձեռնտու է, քան պատերազմելը։ Երբ ինքը դա հասկանում է, մշտապես գտնվում է շատ ավելի վերահսկելի իրավիճակում»։