Հռոմի պապը կոչ է արել Իրանին և Իսրայելին՝ երկխոսություն սկսել

Հռոմի պապ Լևոն XIV-ը կոչ է արել Իրանին և Իսրայելին ցուցաբերել պատասխանատվություն և առողջ բանականություն՝ արդարության, եղբայրության և ընդհանուր բարօրության վրա հիմնված երկարատև խաղաղություն կառուցելու համար։

«Այս օրերին մենք ստանում ենք շատ մտահոգիչ լուրեր. Իրանում և Իսրայելում իրավիճակը լրջորեն վատթարացել է։ Այս դժվարին պահին ես կցանկանայի շտապ կրկին կոչ անել պատասխանատվության և առողջ բանականության»։
Ավելի անվտանգ աշխարհի կառուցումը, որը զերծ է միջուկային սպառնալիքներից, պետք է իրականացվի հանդիպումների և անկեղծ երկխոսության միջոցով, ընդգծել է Հռոմի պապը։ «Ոչ ոք երբեք չպետք է սպառնա մեկ ուրիշի գոյությանը, բոլոր երկրների պարտականությունն է աջակցել խաղաղության գործին՝ բացելով հաշտեցման ուղիներ և խթանելով լուծումներ, որոնք երաշխավորում են բոլորի անվտանգությունն ու արժանապատվությունը», - եզրափակել է Լևոն XIV-ը։