«Տեսնելով Իրանի թուլացումը՝ Ադրբեջանը կարող է դիմել ագրեսիայի ՀՀ նկատմամբ». Լևոն Զուրաբյան

«Ե՛վ Իսրայելի, և՛ Իրանի համար սա գոյության պատերազմ է: Կարելի է կանխատեսել, որ լինելու են բավականին լուրջ բախումներ: Եթե հարվածները, որ Իրանը պետք է հասցնի, լինեն շատ ցավոտ, այդ դեպքում ԱՄՆ-ն ներքաշվելու է պատերազմի մեջ, ինչը և ուզում է Նեթանյահուն»,- «Եվրոմեդիայի» եթերում այս կարծիքը հայտնեց ՀԱԿ փոխնախագահ Լևոն Զուրաբյանը:

Նրա դիտարկմամբ՝ եթե Իսրայելի մատնանշած ուղիով ամեն ինչ ընթանա, ստացվելու է, որ Իրանը այնքան պետք է թուլանա, որ առաջանան ապսամբություններ, սեպարատիստական շարժումներ։ «Այդ ժամանակ արդեն Ադրբեջանի մուտքը այս պատերազմի մեջ դառնում է ավելի հնարավոր: Ամենամեծ խնդիրն այն է, որ այդ մուտքը կարող է սկզբից տեղի ունենա գրոհով դեպի Հայաստան: Այսինքն՝ Ադրբեջանը, ինչ-որ պահի տեսնելով, որ Իրանը շատ է թուլացել, կարող է դիմել ագրեսիայի Հայաստանի նկատմամբ և փորձի գրավել Սյունիքը: Սրանք իրական վտանգներ են, որոնց դեմն առնելու տարբերակ կա»,- ընդգծեց Զուրաբյանը՝ հավելելով, որ այդ առումով կարևոր է ինտենսիվ աշխատանքը Ռուսաստանի հետ, կարևոր է նաև խոսել ԱՄՆ-ի, Արևմուտքի հետ, որպեսզի նրանք ճնշում կիրառեն Ադրբեջանի նկատմամբ: