«Նավթի գները կբարձրանան, եթե Իրանը փակի Հորմուզի նեղուցը»․ #Hürriyet

Նավթի գները կարող են բարձրանալ մինչև 130 դոլար՝ մեկ բարելի դիմաց, եթե Իրանը որոշի փակել Հորմուզի նեղուցը, գրում է թուրքական «Hürriyet» թերթը։

Թեհրանը քննարկում է Հորմուզի նեղուցը փակելու հարցը՝ Իսրայելի կողմից Իրանի վրա հարձակումներից հետո, հունիսի 14-ին հայտարարել էր Իրանի խորհրդարանի ազգային անվտանգության և արտաքին քաղաքականության հանձնաժողովի անդամ Իսմայիլ Կուսարին։

«Աշխարհի նավթի մատակարարումների 20%-ն անցնում է Հորմուզի նեղուցով, Իրանի, Սաուդյան Արաբիայի և Միացյալ Արաբական Էմիրությունների նավթի և հեղուկացված բնական գազի (ՀԲԳ) առևտրի 80%-ն իրականացվում է Հորմուզի նեղուցով»,- գրում է թերթը։
Հրապարակումը ենթադրում է, որ Իսրայելի և Իրանի միջև հակամարտությունը կշարունակվի որոշ ժամանակ։ «Պատերազմի ազդեցությունը տնտեսության վրա կախված է նրանից, թե որքան ժամանակ կշարունակվեն այս հարձակումները և կխորանա՞ն դրանք, թե՝ ոչ։ Եթե պատերազմը շարունակվի, կան մտավախություններ, որ այն կունենա ավերիչ ազդեցություն տնտեսության վրա։ Սակայն եթե պատերազմն ավարտվի 14 օրվա ընթացքում, ինչպես նախատեսված էր, տնտեսության վրա ազդեցությունը սահմանափակ կլինի»,- գրում է թերթը։