«Պետությունն ասել է՝ կրճատեք աշխատակազմը, չենք կրճատել, մեր գրպանից ենք աշխատավարձերը տալիս»․ Նարեկ Կարապետյան

Ներդրվել է էլեկտրաէներգիայի հաշվիչների թվային համակարգը, և 800 հազար մարդ միացրած է այդ համակարգին օնլայն ռեժիմով։ Այս մասին «Նյուզ»-ի եթերում նշեց «ՀԷՑ» ՓԲԸ տնօրենների խորհրդի նախագահ Նարեկ Կարապետյանը՝ ներկայացնելով, թե ինչ է փոխվել ՀԷՑ-ում, երբ այն ձեռք է բերել «Տաշիր» ընկերությունների խումբը։

«Դրա շնորհիվ մենք կարողացանք 40 միլիոն դոլար տարեկան խնայել, այդ միջոցներով վճարել ատոմակայանին, Երևանի ՋԷԿ-ին, որպեսզի էլեկտրաէներգիայի գինը չբարձրանա։ Եթե մենք սա չանեինք վերջին 8-9 տարվա ընթացքում ժողովուրդը պետք է 40 միլիոն դոլար ավել գումար հավաքեր, որպեսզի վճարեր լույսի փողը։

Ուզում եմ նշել, որ ՀՀ–ում գրեթե բոլոր ենթակառուցվածքային ընկերությունները այս նույն ժամանակահատվածում իրենց ծառայությունների գները բարձրացրել են։ Օրինակ «Հայփոստը» պետականացնելուց հետո, վերջին 10 տարվա ընթացքում համարյա երկու անգամ բարձրացրել է իր սակագները, «Վեոլիա ջուրը» վերջին 5-6 տարվա ընթացքում բարձրացրել է 10% ով, Բարձրավոլտը՝ 80%-ով։ Մենք համարյա թե նույն սանդղակի վրա ենք, չնայած որ կան այսպիսի թանկացումներ։ Դա արդյունք էր առաջին հերթին ավտոմատիզացիայի, երկրորդը՝ գողությունների կրճատման, կադրային քաղաքականության ու օպտիմիզացիաների արդյունքում մենք կարողացանք պահել սակագինը ու չունենալ սակագնային աճ»,- ընդգծեց Կարապետյանը։ Նա նաև հավելեց․ «Պետությունն ասել է՝ կրճատեք ձեր աշխատակազմը, մենք չենք կրճատել ու մոտավորապես 10 տարի է՝ տարին 3-4 միլիոն դոլար մեր գրպանից ենք այդ մարդկանց աշխատավարձերը տալիս»։