«Սահմանադրական փոփոխությունները թող լինեն միայն իշխանության լիազորությունների սահմանափակման համար»․ Տաթևիկ Հայրապետյան

Ադրբեջանագետ Տաթևիկ Հայրապետյանի ֆեյսբուքյան գրառումը․ «ՀՀ Սահմանադրության օրվա առթիվ գլխավոր ցանկությունս ու մաղթանքս մեզ այն է, որ երբեք որևէ այլ երկրի թելադրանքով ու կամքով մենք չկանգնենք մեր պետության Սահմանադրությունը փոխելու կամ դրա հետ կապված քվեարկությանը մասնակցելու ընտրության առջև։
ՀՀ Սահմանադրությամբ պետության մեջ բոլոր դերակատարների սահմանները շատ հստակ են դրված, ուղղակի ոմանք, իշխանություն ստանալով, երբեմն մոռանում եմ, թե որ երկրին են կոչված ծառայելու և որ պետության քաղաքացիներին են հաշվետու։ Ուստի կուզեմ, որ մի օր, եթե մենք որպես հանրություն ու պետություն որոշենք գնալ սահմանադրական փոփոխությունների, ապա դա լինի բացառապես իշխանության լիազորությունների սահմանափակման համար․․․
Ինչպես ժամանակին մի սահմանադրագետ շատ իրավացիորեն նկատեց՝ սահմանադրությունները գրվում են ոչ թե լավ, այլ վատ իշխանությունների համար, նրանց զսպելու ու անհրաժեշտության դեպքում պետությունը նրանցից պաշտպանելու համար»։