«Առանձնատունն ինձ չի պատկանում, այն ես չեմ կառուցել»․ Սեյրան Օհանյան

«Առանձնատունն ինձ չի պատկանում»,- այսօր «Ֆակտոր»-ի հետ զրույցում ասել է ԱԺ «Հայաստան» խմբակցության ղեկավար Սեյրան Օհանյանը՝ անդրադառնալով Սևանի այն առանձնատանը, որն ըստ իրեն ներկայացված մեղադրանքի, կառուցվել է ապօրինաբար զավթված հողատարածքում և տարիներ շարունակ չի ներառվել հայտարարագրում։ «Եթե այն ինձ պատկաներ, կլիներ Օհանյան Սեյրանի անունով»,-նշել է Օհանյանը՝ չհերքելով սակայն, որ առանձնատունն ինչ-որ պահի օգտագործվել է իր կողմից․ «Բայց 2023-24թթ․ ես, ընդհանուր առմամբ, այնտեղ չեմ էլ եղել։ Ասում են, որ հայտարարագրի մեջ չի նշվել, սուտ է, հայտարարագում նշվել է այն օրերի քանակությունը, երբ ես եղել եմ այնտեղ։ Մնացածի վերաբերյալ նիստերի ժամանակ իմ պաշտպանությունը կիրականացնեմ։ Առանձնատունը ես չեմ կառուցել, սակայն նախաքննության գաղտնիությունից ելնելով, մանրամասներ չեմ կարող հայտնել»,- ասել է Օհանյանը՝ հերքելով նաև այն հանգամանքը, որ հանձնարարել է ՌՈ աշխատակիցներին՝ առանձնատան շինարարության ընթացքում այնտեղ հսկողություն իրականացնել։