«Անհիմն կալանավորվում են նրանք, ովքեր ունեն ազդեցություն, գաղափար, կամք ու ռեսուրս»․ Արթուր Սուքոյան

Պատգամավոր Լևոն Քոչարյանի օգնական Արթուր Սուքոյանի ֆեյսբուքյան գրառումը․ «Դատարանը՝ Արտակ Կարապետյանի նախագահությամբ, որոշեց կալանավորել պատգամավոր Արթուր Սարգսյանին։ Արթուր Սարգսյանը կալանավորվեց միայն մեկ բանի համար՝ որովհետև նա հայ է, ով ամեն հնարավոր իրավաչափ ձևերով պայքարել է հանուն Հայաստանի Հանրապետության վտանգված ապագայի:
Վերջին շրջանում մենք ականատես ենք լինում, թե ինչպես են մարդկանց կալանավորում անհիմն և շինծու պատճառներով։ Կալանավորվում են նրանք, ովքեր ունեն ազդեցություն, գաղափար, կամք ու ռեսուրս։ Մեկին՝ որովհետև սիրված է, մյուսին՝ որովհետև մտածող է, երրորդին՝ որովհետև փողոցում կարող է մարդկանց ոգեշնչել և այլն։ Այս իշխանությունն այսօր պայքարում է ներուժ ունեցողների դեմ։
Արթուր Սարգսյանի պարագայում այս «մեղքերը» բոլորը մեկտեղ էին։ Նա ուներ ժողովրդական վստահություն, հստակ քաղաքական դիրքորոշում, կազմակերպչական կարողություններ, փողոցային պայքարի փորձ, և ամենակարևորը՝ հայրենասիրական մղում։ Նա այդ ամենը ներդնում էր ոչ թե անձնական շահի, այլ Հայաստանի Հանրապետության գոյության և ինքնիշխանության պաշտպանության համար։
Այդ իսկ պատճառով նրա կալանքը ոչ թե անակնկալ էր, այլ սպասելի, նույնիսկ ուշացած։ Որովհետև այս վարչակարգը վաղ թե ուշ գալիս է բոլոր նրանց հետևից, ովքեր կարող են կանգնել ազգային շահի ու արժանապատվության կողքին։
Հ.Գ.
«Դատավոր» Մասիս Մելքոնյանը, այժմ ունի լուրջ մրցակից՝ նույնքան նվիրված «դատավոր» Արտակ Կարապետյանը։ Ասում են՝ Մասիսը դեռահաս աղջկա պես հիստերիկ խանդերի մեջ է, որ Նիկոլին սպասարկելու ոլորտում հայտնվել է իրենից ավելի հլու և արթուն գործընկեր։
Հ.Գ. 2. Ամենացավալին այն է, որ սա այնքան կանխատեսելի էր, որ գրառումս վաղուց պատրաստ էր․ մնում էր միայն սպասել կալանավորման պաշտոնական որոշմանը, որպեսզի հրապարակի այն»։