Սպիտակ տանը գաղտնի բանակցություններ են ընթանում Գազայի հարցի շուրջ

Երեքշաբթի օրն Սպիտակ տանը գաղտնի բանակցություններ են տեղի ունեցել ԱՄՆ-ի, Իսրայելի և Կատարի բարձրաստիճան պաշտոնյաների միջև՝ պատանդների գործարքի և Գազայում հրադադարի շուրջ տարաձայնությունները քննարկելու համար, Axios-ին և Channel 12-ին հայտնել է գործին ծանոթ 2 անձ։

Նախագահ Դոնալդ Թրամփը վերջին 48 ժամվա ընթացքում երկու անգամ հանդիպել է Իսրայելի վարչապետ Բենիամին Նեթանյահուի հետ՝ ճնշում գործադրելով 2 կողմերի վրա՝ գործարքն ավարտելու համար։

ԱՄՆ-ի հատուկ դեսպանորդ Սթիվ Վիթքոֆը հուլիսի 8-ին հայտարարել է, որ 4 չլուծված հարցերից 3-ը լուծվել են։ Հիմնական խոչընդոտը 60-օրյա հրադադարի համար Իսրայելի բանակի նահանջի գծերն են։

Թրամփի և Նեթանյահուի հանդիպումից կարճ ժամանակ առաջ Վիթքոֆը հանդիպել է Կատարի դեսպանորդ և Նեթանյահուի խորհրդական Ռոն Դերմերի հետ։ Հանդիպումը կենտրոնացած է եղել Իսրայելի բանակի ուժերի վերատեղակայման վրա։

Վիթքոֆը և Կատարը հստակեցրել են, որ Իսրայելի առաջարկած սահմանափակ նահանջն անընդունելի է։ Կատարը զգուշացրել է, որ ՀԱՄԱՍ-ը, հավանաբար, կմերժի այն, և բանակցությունները կարող են ձախողվել։ Այնուամենայնիվ, Կատարը խնդրել է չմեղադրել իրեն, քանի որ ինքը միջնորդ է։

Վիթքոֆը նշել է, որ «Սմոտրիչի պլանին» նման դուրսբերման քարտեզն անընդունելի է Թրամփի վարչակազմի համար։

Դերմերը պատասխանել է, որ Նեթանյահուն գտնվում է կոալիցիայի ճնշման տակ, և որ որոշումները պետք է հաստատվեն կառավարության կողմից։

Այնուամենայնիվ, Իսրայելը ավելի ուշ ներկայացրել է նոր քարտեզ՝ ավելի լայն դուրսբերմամբ, ներառյալ «Մորագի միջանցքը»։ Սա զգալիորեն առաջ է մղել բանակցությունները։

Աղբյուրներից մեկը նշել է, որ նոր քարտեզը մեծացրել է համաձայնության հասնելու հնարավորությունները։ Երկրորդը հավելել է. «Դեռ կան տարաձայնություններ, բայց մենք շարժվում ենք դրական ուղղությամբ»։

Նույն օրը Նեթանյահուն Քոնգրեսին ասել է, որ Իսրայելը մտադիր է հասնել իր բոլոր ռազմական նպատակներին Գազայում. «Դա նշանակում է ՀԱՄԱՍ-ի պարտություն և զինաթափում: Մենք պատրաստ ենք ավարտել պատերազմը այնպիսի պայմաններով, որոնք կխանգարեն ՀԱՄԱՍ-ին շարունակել գործել, և դրա համար կա կոնկրետ ծրագիր»։ Վարչապետի խոսքով՝ «դա պահանջում է ռազմավարություն և քայլեր, որոնցից մի քանիսը ցավոտ են Իսրայելի, իսկ մի քանիսը՝ շատ ցավոտ ՀԱՄԱՍ-ի համար»։