Այն կարող էր պատկանել միայն Մակեդոնացուն. հնագույն տունիկայի գաղտնիքը

Հույն մարդաբան Անտոնիս Բորցիոկասը հանրությանն է ներկայացրել նոր վարկած, որը կարող է փոխել պատկերացումները Վերգինայի արքայական նեկրոպոլի մասին: Գիտնականը վստահեցնում է, որ համար 2 դամբարանը պատկանում է ոչ թե Ալեքսանդր Մակեդոնացու հորը՝ Ֆիլիպ 2-րդին, այլ խորթ եղբորը՝ Ֆիլիպ 3-րդին: Սակայն ամենազարմանալին այն է, որ գտածոների մեջ հայտնաբերվել են գործվացքի մնացորդներ, որոնք, շատ հնարավոր է՝ պատկանել են հենց Մակեդոնացուն:
Կես դար առաջ հունական Վերգինա քաղաքում հնագետները պեղել էին արքայական դամբարանների համալիր, որը թվագրվում է մ.թ.ա. 4-րդ դարով: Երկար ժամանակ կարծիք կար, որ ամենաշքեղ դամբարանը (համար 2) պատկանել է Ֆիլիպ 2-րդին: Սակայն հետագայում հայտնվել են նոր ապացույցներ, ըստ որի, այստեղ թաղված է նրա որդին՝ Ֆիլիպ 3-րդը, որը մի որոշ ժամանակ կառավարել է Մակեդոնացու մահից հետո: Նրա հետ, հավանաբար, թաղվել է նաև կինը՝ Էվրիդիկան:
Դամբարանի ոսկե դագաղում հայտնաբերվել են գործվածքի կտորներ: Անալիզները ցույց են տվել, որ այն մի քանի շերտից կազմված բամբակյա կտոր է, արտաքինից ներկված մանուշակագույն, ներսից՝ սպիտակ:
Բարցիոկասը ենթադրում է, որ գործվածքը Մակեդոնացու պարսկական տունիկայի մնացորդներ է: Հայտնի է, որ պարսկական կայսրության նվաճումից հետո Մակեդոնացին կրել է պարսկական տունիկա: Մ.թ.ա. 323 թվականին վերջինիս մահից հետո հագուստն ու այլ իրեր անցել են խորթ եղբորը՝ Ֆիլիպ 3-րդին, արդյունքում էլ հայտնվել նրա դամբարանում:
Հետաքրքիր է, որ դամբարանի պատերին պատկերված է եղել որսի տեսարան, որտեղ, ըստ հնագետների, ուշադրության են արժանի երեք կերպար. մանուշակագույն տունիկայով որսորդը, որը, հավանաբար, Մակեդոնացին է և ևս երկու անձ՝ նրա հայրն ու եղբայրը:
Զարդագոտու մեջ կարելի է տեսնել նաև այծյամների պատկերներ, որոնք բնորոշ չեն Հունաստանին, բայց սովորական են Պարսկաստանի համար: Կարելի է ենթադրել, որ տեսարանը ներկայացնում է ասիական որս, հավանաբար, արդեն Ալեքսանդրի արշավանքներից հետո:
Այս ամենից կարելի է եզրակացնել, որ եթե այս նոր վարկածը ճիշտ է, ապա համար 2 դամբարանը չէր կարող պատկանել Ֆիլիպ 2-րդին, քանի որ պարսկական մոտիվներով տեսարանները հայտվել են նրա մահից հետո: Հետևաբար, դամբարանը կառուցվել է Ֆիլիպ 3-րդի և նրա կնոջ՝ Էվրիդիկայի համար: