«Թող ջուրը մաքրի խեղաթյուրված ինստիտուտներն ու չարաշահված պաշտոնները»․ Սոնա Աղեկյան

«Մայր Հայաստան» դաշինքի անդամ Սոնա Աղեկյանի ֆեյսբուքյան գրառումը․ «Ջուրը մենք ցողում ենք ոչ թե անպատասխանատու ուրախության համար, այլ՝ միմյանց սթափեցնելու, մաքրագործելու, հիշեցնելու, որ սրբությունները չեն վաճառվում։
Տեսնենք մեր քաղաքներն ու գյուղերը. արդյոք Վարդավառը հնարավոր է նշել մի քաղաքում, որտեղ աղբահանությունն է խնդիր, որտեղ ջրի խողովակները վաղուց մոռացել են, թե ինչ է աղբյուրի մաքրությունը, որտեղ հոգևոր աղբյուրներն էլ կարծես աղտոտվել են ստի, կեղծիքի, կոռուպցիայի ու անպատժելիության լցված հեղեղներից։
Սակայն հենց այս հողի վրա է, որ կարող է ծլել վերածննդի ծաղիկը։ Վարդավառի ջուրը պիտի ոչ միայն մարմինը թրջի, այլև հողը՝ արդարության ու արժեքների սերմեր ցողելով։
Այս Վարդավառին եկե՛ք ջուր ցողենք ոչ թե միայն խաղալու, այլ՝ արթնացնելու համար։ Թող ջուրը հորդի թշնամանքի պատերի վրա, մաքրի խեղաթյուրված ինստիտուտներն ու չարաշահված պաշտոնները։ Թող Վարդավառի ջուրը նոր էջ բացի՝ թե՛ ժողովրդի ինքնագիտակցության, և թե՛ պետության բարոյական պատասխանատվության համար»։