«Եթե հանդիպեն և ինչ-որ մի թուղթ ստորագրեն, դա կարող է պարունակել միայն մեկ դրույթ»․ Արման Մելիքյան

Արցախի ԱԳ նախկին նախարար Արման Մելիքյանի ֆեյսբուքյան գրառումը. «Եթե այս ուրբաթ օրը Ալիևն ու Փաշինյանը ԱՄՆ նախագահ Թրամփի հյուրընկալ տանիքի տակ, այնուամենայնիվ, հանդիպեն և ինչ-որ մի թուղթ ստորագրեն՝ խաղաղություն հաստատելու իրենց անմնացորդ պատրաստակամության վերաբերյալ, ապա, ներկա իրավիճակում, այն, թերևս, կարող է միայն մեկ առարկայական դրույթ պարունակել՝ դա վիճելի հարցերը բացառապես խաղաղ, դիվանագիտական միջոցներով կարգավորելու պարտավորությունը կլինի։ Միայն նման ձևակերպումն արժեք կունենա ԱՄՆ նախագահի համար և իմաստ կհաղորդի վաշինգթոնյան հանդիպմանը։ Այս հարցի շուրջ համաձայնությունը գուցե լրացվի նաև հնարավոր միջադեպերը համատեղ քննելու պայմանավորվածությամբ ու կարող է նախատեսել չեզոք երրորդ կողմի՝ ԱՄՆ-ի, մասնակցությունը (մի շարք պատճառներով ես սա քիչ հավանական եմ համարում, թեև չեմ բացառում)։ Բայց, եթե այս թղթի ստորագրմանը զուգահեռ նախագահ Թրամփը կարողանա Բաքվին դրդել ազատելու հայ պատանդներին, ապա դա կլինի ամերիկյան կողմի կարևորագույն քաղաքական ձեռքբերումը»։