«Իրանը կոշտացրեց դիրքորոշումը՝ Վաշինգթոնում ստորագրված հռչակագրի հետ կապված»․ Վարդան Բալյան

Քաղաքական վերլուծաբան Վարդան Բալյանի ֆեյսբուքյան գրառումը․ «Իրանը կոշտացրեց դիրքորոշումը Վաշինգտոնում ստորագրված եռակողմ հռչակագրի հետ կապված: Ռահբարի խորհրդական Վելայաթին իր հարցազրույցում հայտարարել է՝
«Հարավային Կովկասն անտեր տարածաշրջա՞ն է, որ Թրամփը վարձակալում է: Կովկասը ամենազգայուն աշխարհագրական կետերից մեկն է աշխարհում, և այդ ճանապարհը կդառնա ոչ թե Թրամփին պատկանող միջանցք, այլ նրա վարձկանների գերեզմանը»:

Իրանի նախկին արտգործնախարարը հստակ շեշտել է, որ Իրանը Ռուսաստանի հետ կամ առանց նրա խոչընդոտելու է միջանցքի կառուցմանը, քանի որ այդ նախագիծը սպառնալիք է տարածաշրջանային անվտանգությանը և փոխում է նրա աշխարհաքաղաքական քարտեզը: Հետաքրքրական է Հայաստանին անդրադարձը. սահմանների դե ֆակտո փոփոխությունը միտված է կազմաքանդելու Հայաստանը:
«Երբ Թուրքիան և Ադրբեջանի հանրապետությունը պահանջում էին այդ միջանցքի կառուցումը, Իրանի Իսլամական հանրապետության զինված ուժերը գեներալ-լեյտենանտ Շահիդ Բաղերիի հրամանատարությամբ, ով այդ ժամանակ Իրանի զինված ուժերի Գլխավոր շտաբի պետն էր, անցկացրեցին բազմաթիվ վարժանքներ Իրանի հյուսիս-արևմուտքում, ինչն ի ցույց դրեց Իրանի պատրաստությունը և լուրջ մտադրվածությունը հակազդելու այդ գործողություններին:
...Թրամփն ինչպես միշտ բարձրագոչ ու ոչինչ չարժեցող հայտարարություններ է անում: Նա մտածում է, թե ինքն անշարժ գույքի գործակալ է և ուզում է վարձակալել հող կամ շրջան»:
Վելայաթիից բացի՝ բազմաթիվ իրանցի փորձագետներ և պետական ու քաղաքական գործիչներ համակարծիք են, որ ամերիկա-իսրայելական այս օպերացիան մաս է կազմում Իրանին շրջափակելու և խեղդամահ անելու համապարփակ ծրագրի, որ Իսլամական հանրապետության համար գոյաբանական սպառնալիքներ է ստեղծում, հետևաբար, հակազդեցությունը լինելու է համարժեք»: