«Նիկոլ Փաշինյանը գծեց իր նախընտրական ծրագրի շրջանակը». Հակոբ Բադալյան

Քաղաքական մեկնաբան Հակոբ Բադալյանի ֆեյսբուքյան գրառումը. «Նիկոլ Փաշինյանը գծեց իր նախընտրական ծրագրի շրջանակը, այդպիսով վերհաստատելով իմ այն գնահատականը, որ վաշինգտոնյան ակտը ոչ թե խաղաղության, այլ Հայաստանում խորհրդարանի ընտրության մասին է:
Այլապես, խաղաղության մասին ակտը կխոսեր ինքն իր փոխարեն, այլ ոչ թե այդ ակտի փոխարեն կխոսեր Նիկոլ Փաշինյանը, կամ ավելի շուտ՝ «կենաց կձոներ խաղաղությանը», գործնականում նենգափոխելով այն:
Նենգափոխելով, որովհետեւ խաղաղության հասնելն այն է, երբ դու կաս՝ եւ դու հասնում ես խաղաղության: Երբ խաղաղության գինը քո չլինելն է, ուրիշ ինչ ուզում ես դարձիր՝ դա արդեն խաղաղություն չէ, այլ ընդամենը՝ «պիգմալիոնություն», երբ քանդակում ես ինչ որ բան ու անունը դնում խաղաղություն, բայց դրանից քանդակը չի դադարում քանդակ լինելուց:
Ընդ որում, «պիգմալիոնը» Նիկոլ Փաշինյանը չէ: Նա խոսնակն է: Նա չէ խաղաղությանը հասնողը, նա քանդակը հայ հանրությանը մատուցողն է:
Այս գրառումս ֆանատների համար չէ, այլ մտածող եւ քննող մարդկանց, որովհետեւ իրական խաղաղությունը անվանակոչված քանդակից տարբերել չկարողանալը ժողովուրդների ու հանրությունների համար թակարդ է, ոչ թե ցատկահարթակ:
Ընդ որում, մատուցվում է նաեւ թակարդի «բանաձեւը»՝ խնամեք խաղաղությունը:
Ասել կուզի՝ եթե խաղաղություն չլինի, ուրեմն դուք եք մեղավորը՝ վատ եք խնամել:
Փաշինյանը լավ է անում իր՝ իշխանությունը պահելու գործը:
Ուրիշ ինչ հասարակական-քաղաքական գործ է արվում Հայաստանում, որպեսզի հանրությունը չհայտնվի իր մարդկային պարզ ու հասկանալի ցանկությունների քարոզչա-քաղաքական թակարդններում:
Սա մեծագույն հարցն է, որ առկա է Հայաստանում տարիներ շարունակ: Ու այդ հարցը սրվում է ամեն հաջորդ օր»: