ԵՄ-ն դադարեցնում է Իսրայելին տրամադրվող ֆինանսական աջակցությունը

Եվրոպական հանձնաժողովը (ԵՀ) այսօր հայտարարել է Իսրայելին տրամադրվող օգնությունը կասեցնելու որոշման մասին, բացառությամբ քաղաքացիական հասարակությանը և Հոլոքոստի «Յադ Վաշեմ» հուշարձանին տրամադրվող աջակցության։

«Գազայի հատվածում ամեն օր տեղի ունեցող սարսափելի իրադարձությունները պետք է դադարեցվեն։ Անհրաժեշտ է անհապաղ հրադադար, մարդասիրական օգնությունների անարգել մուտք և ՀԱՄԱՍ-ի կողմից պահվող բոլոր պատանդների ազատ արձակում։ Եվրոպական Միությունը մնում է մարդասիրական օգնության ամենամեծ դոնորը և

երկու պետությունների համակեցության անսասան սկզբունքի կողմնակիցը», - ասել է Եվրահանձնաժողովի նախագահ Ուրսուլա ֆոն դեր Լեյենը։

Եվրոպական հանձնաժողովի հաղորդագրության մեջ բացատրվում է, որ հայտարարված որոշումը վերաբերում է մասնավորապես 2025-2027 թվականների համար տարեկան հատկացումներին, ինչպես նաև Իսրայելի հետ ընթացիկ ինստիտուցիոնալ համագործակցության նախագծերին և ԵՄ-Իսրայել տարածաշրջանային համագործակցության մեխանիզմի շրջանակներում ֆինանսավորվող նախագծերին։