«Փաշինյանը մի շարք օրենքներ է խախտել, դրանց համար պիտի պատասխան տա»․ Հովիկ Աղազարյան

«Այն բառապաշարը, որ նրանք օգտագործում են միմյանց նկատմամբ, համարում եմ անթույլատրելի։ Այս մասին «Նյուզ»-ի հետ զրույցում նշեց ՔՊ-ից հեռացված ԱԺ պատգամավոր Հովիկ Աղազարյանը՝ անդրադառնալով Նիկոլ Փաշինյանի և Լևոն Տեր-Պետրոսյանի միջև առկա հակամարտությանն ու հեռակա «փոխհրաձգություններին»։

Աղազարյանի դիտարկմամբ՝ Նիկոլ Փաշինյանը և Լևոն Տեր-Պետրոսյանն ընդհանրություններ ունեն՝ «երկուսն էլ մեծագույն սեր ունեն իրենց սեփական անձի նկատմամբ և իրենցից այն կողմ աշխարհ չեն տեսնում»։

Անդրադառնալով հարցին, թե ինչու է նրանց միջև հեռակա բանավեճ ծագել, Աղազարյանը պատասխանեց․ «Բոլոր դեպքերում Լևոն Տեր-Պետրոսյանը միտք ունի, խոսք ունի, կարող է որոշակի ազդեցություն ունենալ գործընթացների վրա, թիմում էլ բավականին լուրջ մարդիկ կան, և հետևաբար Նիկոլը աջ-ձախ պետք է ինչքան կարող է իր հակառակորդներին չեզոքացնի, մեկին բանտով, մեկին խոսքերով մեկուսացնի։ Ինքն արդեն այն վիճակում է հայտնվել, որ չի կարող պարտվել, որովհետև դա չգիտես ինչ հետևանքներ կունենա իր համար․․․ Ինքը մի շարք օրենքներ է խախտել, դրանց համար պիտի պատասխան տա»։

Անդրադառնալով ճշտող հարցին, թե հնարավո՞ր է Փաշինյանը դատարանի առաջ կանգնի, Աղազարյանը պատասխանեց․ «Ես կարծում եմ, որ կարող է այնպիսի իշխանություն լինի, որ նման քայլի գնա»։

Խոսելով «չորրորդ հանրապետության» գաղափարի մասին, Աղազարյանն ընդգծեց, որ Փաշինյանը դա առաջ է քաշել, որ «ձեռքի հետ Թուրքիային և Ադրբեջանին հաճո և իր համար ընդունելի շատ բաներ «սղղացնի»»։