«Չեմ կարծում, որ շաթդաունն այդքան երկար կտևի». ԱՄՆ-ի փոխնախագահ

1081

Չորեքշաբթի, 01 հոկտեմբերի, 2025 թ., 23:56

ԱՄՆ-ի փոխնախագահ Ջ.Դ. Վենսը վստահ է, որ ամերիկյան կառավարության մասնակի փակումը՝ շաթդաունը, որը սկսվել էր երեկ երեկոյան, երկար չի տևի։

«Ես իսկապես չեմ կարծում, որ շաթդաունն այդքան երկար կտևի»,- ասել է Վենսը Սպիտակ տանը կայացած ճեպազրույցի ժամանակ։

Նա նաև իրավիճակի համար մեղադրել է Դեմոկրատական կուսակցությանը։

«Սենատի դեմոկրատների ձախ թևը փակել է կառավարությունը, քանի որ մենք հրաժարվել ենք նրանց տրամադրել հարյուր միլիարդավոր դոլարների առողջապահական նպաստներ անօրինական ներգաղթյալների համար», - նշել է փոխնախագահը։

Վենսը նշել է, որ այս ծախսերը բյուջեում ներառելու պահանջը դեմոկրատների առաջարկի առաջին կետն էր կառավարության վերաբացման վերաբերյալ։

Սեպտեմբերի 29-ին նախագահ Դոնալդ Թրամփը Սպիտակ տանը բանակցություններ է վարել երկու կուսակցությունների առաջնորդների հետ՝ կառավարության ժամանակավոր ֆինանսավորման վերաբերյալ։ Հանդիպումն ավարտվել է առանց արդյունքի. կողմերը չեն կարողացել համաձայնության գալ և շարունակել են միմյանց մեղադրել առաջիկա շաթդաունի համար։