«Իսրայելը և ՀԱՄԱՍ-ը ստորագրել են մեր խաղաղության ծրագրի առաջին փուլի համաձայնագիրը»․ Թրամփ

ԱՄՆ նախագահ Դոնալդ Թրամփը հայտարարել է, որ Իսրայելը և Համասը համաձայնագրեր են ստորագրել իրենց խաղաղության ծրագրի առաջին փուլի շրջանակներում։

«Ես հպարտությամբ եմ հայտարարում, որ Իսրայելը և Համասը ստորագրել են մեր խաղաղության ծրագրի առաջին փուլը», - գրել է նա Truth Social-ում։

Համաձայնագրերի արդյունքում բոլոր պատանդները «շատ շուտով» կազատվեն, և Իսրայելը իր զորքերը կհեռացնի համաձայնեցված գծի վրա՝ «որպես առաջին քայլ դեպի երկարատև և կայուն խաղաղություն», - պարզաբանել է Թրամփը։

Իսրայելական աղբյուրը CNN-ին հայտնել է, որ պատանդները, ինչպես սպասվում է, ազատ կարձակվեն հոկտեմբերի 11-ին, շաբաթ օրը կամ հոկտեմբերի 12-ին, կիրակի օրը։ Համասը շաբաթ օրը կազատ արձակի բոլոր ողջ մնացած պատանդներին, The Times of Israel-ին հայտնել են երկու աղբյուրներ։ ԱՄՆ բարձրաստիճան պաշտոնյան Axios-ին ասել է, որ պատանդները կազատ արձակվեն Իսրայելի կաբինետի կողմից համաձայնագրի հաստատումից 72 ժամ անց, ինչը պետք է տեղի ունենա ոչ ուշ, քան հոկտեմբերի 13-ը, երկուշաբթի օրը։

Իսրայելի վարչապետ Բենիամին Նեթանյահուն համաձայնագիրը անվանել է «մեծ օր Իսրայելի համար»։

«Վաղը ես կհավաքեմ կաբինետը՝ համաձայնագիրը հաստատելու և մեր բոլոր սիրելի պատանդներին տուն վերադարձնելու համար», - ասվում է նրա գրասենյակի հայտարարության մեջ։