«Չորքոտանի ռոբոտով հիացողները գուցե հարցնեն՝ իսկ ինչո՞ւ նպատակահարմար չէ մարտունակ բանակը»․ Հակոբ Բադալյան

Քաղաքական մեկնաբան Հակոբ Բադալյանի գրառումը․ «Ադրբեջանի «շքերթի» մասին խոսելու շատ բան կա մի կողմից, և ըստ էության՝ խոսքերն ավելորդ են թվում, մյուս կողմից, որովհետև թե շքերթի անտուրաժը՝ Էրդողանի ու Շարիֆի մասնակցությամբ (բացակայում է թերևս Նաթանյահուն), թե՛ Ալիևի հռետորաբանությունը ընդհանրապես՝ ինքնին խոսուն են:
Տխուր խորհրդանշականությամբ, Ադրբեջանի այդ ռազմական ցուցադրության ֆոնին Հայաստանի վարչապետը հայ հանրությանն է ներկայացնում «Հայաստանի զինվորների նոր ընկերոջը»՝ ինչ որ «չորքոտանի ռոբոտի», և կոչ անում քաղաքացիներին հիսուն հոգանոց խմբեր կազմել, որպեսզի նրանց տանի և ցույց տա նոր դիրքային ինժեներիան և սպառազինությունը:
Մարդը, որ պատերազմի ժամանակ քաղաքացիներին կոչ էր անում հանդերձանք «ճարել» ու կամավորական խմբեր կազմել պատերազմ գնալու համար՝ այդ ընթացքում փաստորեն լավ իմանալով, որ պատերազմն էլ գնում է դեպի անփառունակ պարտություն, այժմ կոչ է անում կազմել 50 հոգանոց խմբեր, որպեսզի նրանց ցույց տա դիրքային նոր ինժեներիան ու սպառազինությունը:
Եվ դա այն պարագայում, որ ավելի ճիշտ կլինի թերևս քաղաքացիների հարցը, թե ինչու, օրինակ, պետք է Հայաստանում հրաժարվենք «մարտունակ բանակ» բառակապակցությունից՝ ինչպես օրերս հորդորում էր Նիկոլ Փաշինյանը, և օգտագործենք՝ «պաշտպանունակ բանակ» արտահայտությունը: Ինչո՞ւ չի կարելի կամ նպատակահարմար չէ «մարտունակ բանակը»: Գուցե չորքոտանի ռոբոտով հիացողները այդ հարցն ուղղեն այդ ռոբոտի պատկերը ներկայացնող վարչապետ Փաշինյանին:
Որովհետև, եթե չի կարելի «մարտունակ բանակ» ասել, գուցե չի կարելի նաև, որ այդ ռոբոտը հաչա՞:
Սա, իհարկե, կատակի թեմա չէ, որովհետև հարցը իսկապես շատ էական է: Ադրբեջա՞նն է դժգոհ «մարտունակ բանակից», թե՞ Նիկոլ Փաշինյանն ինքն է համարում, որ դա «կոնֆլիկտային» է, իսկ ահա «պաշտպանունակը»՝ խաղաղատենչ:
Այդ դեպքում, հարգելի 50 հոգանոց խմբեր, երբ գնաք նոր ինժեներիան տեսնելու, գուցե խնդրեք ձեզ ցույց տան նաև ձեր տեսածի համար Ադրբեջանի արտոնագիրը: Որովհետև, եթե «արտոնված» չէ նույնիսկ «մարտունակ բանակ» արտահայտությունը, այդ դեպքում մեծ հարց է՝ ձեր ցույց տրվողը արտոնվա՞ծ է, և որպես ի՞նչ՝ որպես իրական մարտունակություն ապահովելու կոչված գորշոն, թե՞ զուտ նախընտրական ցուցանմուշ»: