«Մեզ նախապատրաստում են հետպարտության նոր վերջնագրերին». Թաթուլ Հակոբյան

Լրագրող Թաթուլ Հակոբյանի ֆեյսբուքյան գրառումը. «Ադրբեջանի հետ պատերազմում մենք պարտվել ենք: Սա, անշուշտ, ողբերգություն է, ինչպես բոլոր այն պետությունների համար, որոնք պատմության այս կամ այն ժամանակահատվածում կրել են նվաստացուցիչ պարտություններ:
Արդեն մեզ նախապատրաստում են հետպարտության նոր վերջնագրերին.
ա/ անկլավների վերադարձ և Հյուսիս-Հարավ ճանապարհին երկու նոր խոցելի օջախ՝ Տիգրանաշեն/Քյարքի և Ոսկեպարի հատված,
բ/ Ադրբեջանին անխոչընդոտ կապի տրամադրում Արաքսի երկայնքով,
գ/ Սահմանադրության և Անկախության Հռչակագրի խմբագրում,
դ/ պատմության վերաշարադրում և նոր պատմության ներդրում,
ե/ ադրբեջանցիների՝ Հայաստան վերադարձի առայժմ հոգեբանական ճնշում...
Թվում է, մեր պարտությունը վերջ չունի, մղձավանջը վերջ չունի:
Շատ կարևոր է մեկ այլ բան. մենք պարտություն չկրենք նաև տնտեսապես և ժողովրդագրական իմաստով: Այ, այս դեպքում կլինի մեր վերջը:
Ոմանք համարում են, որ սա արդեն մեր վերջն է: Ես այդպես չեմ համարում և իմ տեղում ու իմ համեստ հնարավարություններով փորձում եմ չհանձնվել ու չեմ հանձնվելու:
Եթե մենք կարողանանք կառուցել առողջ հասարակություն (ցավոք, գործող իշխանությունները անդադար սև-սպիտակ բաժանումներ են անում), ունենալ լավ կրթական համակարգ, ազնիվ տնտեսական մրցակցություն և վերջապես տնտեսապես ուժեղ Հայաստան, ապա մենք մեր համեստ տեղը կունենանք այս հրաշք մոլորակի մեր անկյունում:
Եթե մենք կարողանանք ժողովրդագրական իմաստով ունենալ հաջողություններ, ինչպես ունեցանք խորհրդային յոթանասուն տարիներին, ապա մեր պետականությունը չի սասանվի:
Բոլորս ցավ ենք ապրում անկախության շրջանում ունեցած տասնյակ հազարավոր զոհերի ու վիրավորների, հարյուր հազարավոր փախստականների, կորցած հողերի համար: Բայց այդ ամենը նաև մեզ պետք է մղի նրան, որ ավելի գնահատենք ու կարևորենք այսօրվա ունեցածը՝ Հայաստանի Հանրապետությունը»: