Ամերիկացի 2 տղամարդ պլանավորել են կղզի գրավել և իրագործել բռնաբարության մասին իրենց երևակայությունները

The Guardian-ը, հղում անելով ԱՄՆ դատախազությանը, հաղորդում է, որ Թեքսասի երկու բնակիչ՝ 21-ամյա Գևին Ռիվերս Վայզենբերգը և 20-ամյա Թաններ Քրիստոֆեր Թոմասը, մեղադրվել են Հայիթիի Գոնավ կղզու վրա հարձակվելու դավադրության համար։

Ըստ թերթի՝ քննիչները կարծում են, որ մեղադրյալները քննարկել են կղզում ապրող տղամարդկանց սպանելու և կանանց ու երեխաներին գերի վերցնելու հարցը, որպեսզի կարողանան այնտեղ իրագործել բռնաբարության մասին իրենց երևակայությունները։ Գոնավեն ընտրելու դրդապատճառները չեն նշվում։ ԱԿղզու բնակչությունը կազմում է 85,000-100,000 մարդ։

Քննիչները հայտնել են, որ երիտասարդ տղամարդիկ սկսել են պլանավորել իրենց ծրագիրը 2024 թվականի օգոստոսից։ Նրանք սովորել են հայիթյան կրեոլերեն լեզուն և սկսել են փնտրել մարդկանց, որոնց ցանկանում էին հավաքագրել ներխուժմանը մասնակցելու համար։ Մեղադրյալներից մեկը, ըստ դատախազների, զորակոչվել է ԱՄՆ-ի բանակ՝ ռազմական հմտություններ ձեռք բերելու համար։ Քննիչները պնդում են, որ մեղադրյալները քննարկել են նավակ, զենք և զինամթերք գնելու հարցը։ Վայզենբերգը նաև պլանավորել էր ուղևորություն դեպի Թաիլանդ՝ առագաստանավարկության դասերի համար, բայց չէր կարողացել վճարել դասընթացի համար։
Նրանց մեղադրանք է առաջադրվել օտարերկրյա պետությունում մարդկանց սպանելու, խեղելու կամ առևանգելու դավադրության, ինչպես նաև մանկական պոռնոգրաֆիա արտադրելու համար։ Հիմնական մեղադրանքների համար առավելագույն պատիժը ցմահ ազատազրկումն է։ Մեղադրյալների փաստաբանները մեղադրանքներն անվանել են «անհիմն» և պնդել, որ գործը «անտեղի աղմուկ» է առաջացրել։