«Սա օրենքի լեզու չէ, քաղաքական գործարքի լեզու է, որը կարող է փոխվել, երբ փոխվի ճնշման կշիռը»․ Արման Բաբաջանյան

ԱԺ նախկին պատգամավոր Արման Բաբաջանյանի ֆեյսբուքյան գրառումը․ «Բաքվի դատարանն Արցախի առաջնորդների մի մասին ցմահ ազատազրկման դատապարտեց։ Մեր հավաքական անելիքը երեք շերտ ունի։ Առաջին՝ իրականությանը պետք է ճիշտ անուն տալ․ սա պատանդառություն է և քաղաքական հետապնդում, որի նպատակը ոչ թե «արդարադատությունն» է, այլ շանտաժը՝ Հայաստանի վրա համակարգված ճնշում գործադրելու համար։ Երկրորդ՝ օրակարգը պետք է դառնա ամենօրյա ու միջազգային․ ոչ թե մեկ հայտարարություն, մեկ ակցիա, մեկ հուզական պոռթկում, այլ շարունակական աշխատանք՝ կառավարություն, խորհրդարան, դիվանագիտություն, իրավական թիմեր, սփյուռքյան կառույցներ, մեդիա․ նույն խոսքը, նույն պահանջը, նույն հասցեատերերը՝ այնքան ժամանակ, մինչև արդյունքը լինի ազատ արձակումը։ Երրորդ՝ մենք պետք է վերածենք ցավը կազմակերպված ուժի․ հանրային դաշտում պահել թեման, ստեղծել մշտական ճնշման մեխանիզմներ, որ ադրբեջանցիների հետ որևէ բանակցություն, քննարկում չանցնի առանց այս հարցի։
Մեզ պետք է հստակ, կոշտ և չշեղվող պետական դիրքորոշում՝ անհապաղ և անվերապահ ազատ արձակում, միջազգային մշտադիտարկման մշտական մեխանիզմ, և պատասխանատվության օրակարգ՝ կոնկրետ գործիքներով։ Երբ պետությունը սա դարձնում է առաջնահերթ խնդիր, աշխարհը հստակ հասկանում է՝ խաղաղությունը չի կարող կառուցվել պատանդառության վրա, որ սա ոչ թե երկրորդական «մարդասիրական թեմա» է, այլ անվտանգություն, արժանապատվություն և պետական շահ։
Դա վերջնական «դատավճիռը» վերջ չէ, որովհետև դա օրենքի լեզու չէ, դա քաղաքական գործարքի լեզու է։ Իսկ քաղաքական գործարքը փոխվում է, երբ փոխվում է ճնշման կշիռը։ Մենք պարտավոր ենք այդ կշիռը ստեղծել՝ միասին, համառ և սառը հաշվարկով։ Մեր հայրենակիցները չպետք է մնան մենակ՝ երբեք և ոչ մի պայմանով։ Իսկ մենք իրավունք չունենք այս ցավին սովորելու։ սա մեր խղճի, մեր արժանապատվության ու մեր պետականության փորձությունն է»։