Ադրբեջանը բողոք է ներկայացրել ՄՕԿ՝ Հայաստանի գեղասահորդների կողմից «Արցախ» երաժշտության ընտրության համար

Ադրբեջանի ազգային օլիմպիական կոմիտեն (ԱՕԿ) պաշտոնական բողոք է հղել Միջազգային օլիմպիական կոմիտեին (ՄՕԿ)՝ 25-րդ ձմեռային Օլիմպիական խաղերի շրջանակում Հայաստանը ներկայացնող գեղասահորդներ Նիկիտա Ռախմանինի և Կարինա Ակոպովայի ելույթի կապակցությամբ։ Ադրբեջանական կողմի դժգոհության պատճառը մարզական զույգի ծրագրում ընդգրկված «Արցախ» ստեղծագործությունն է, որը Բաքուն գնահատել է որպես քաղաքական բնույթ կրող քայլ և անջատողականության քարոզչություն։
Համաձայն տարածված հաղորդագրության՝ Ադրբեջանի ԱՕԿ-ը պնդում է, որ միջազգային սպորտային հարթակում նման երաժշտության ընտրությունը հակասում է օլիմպիական արժեքներին և խախտում սպորտի չեզոքության սկզբունքը։ Բողոքում հղում է կատարվում Օլիմպիական խարտիային, որն արգելում է քաղաքական, կրոնական կամ ռասայական քարոզչության ցանկացած դրսևորում մրցումների ընթացքում։

Իտալիայում անցկացվող 2026 թվականի ձմեռային Օլիմպիական խաղերում Հայաստանը գեղասահքում ներկայացնում է սպորտային զույգ Կարինա Ակոպովա – Նիկիտա Ռախմանին։ Նրանք Օլիմպիական խաղերի ուղեգիր են նվաճել 2025-ին անցկացված ընտրական մրցաշարում՝ ապահովելով Հայաստանի առաջին օլիմպիական մասնակցությունը զույգ գեղասահքում անկախությունից հետո։